دیار
لە ساختار ڕێژیم جومهوری ئسلامی، خودعە، شاردن، درو و لاپوشانی و ئرجاعدان وە شەریعەت و دەست ئاسمانی بەش سەرەکییە و وە گشتی نە توان ڕاسییەگان بزانن و هەوڵ دەن کەس ڕاسی نەزانێد.
داڕشانن سناریۆ ئەڕای وەلاڕی بردن زەین کۆمەلگا لەو بەشەیلەسە ک ڕێژم هەزینە و کات فرەییگ ئەڕای دیاری کردیە و کەی، هەر جاریییگ لە جوغرافیای ئیران، ڕووداوییگ سەرهەڵدەی، بایس چاوەڕی ڕووداوییگ دلتەزین بویمن.
لە مانگ لەیەوەری تا ئیسکە، لە چەن شارێ ئێران وە تایبەتی شارەیل باشوور ئێران ناڕزایەتی و تەزاهورات بەردەوامە و خەڵق داوای مافە ڕەواگانیان کەن و لە بەشییگ لە خونیشاندانەیلە ڕووی مەردوم مەستەقیم وەرەو دەسەڵاتدارەیل ڕێژیمە.
ئی نارزایەتییەیلە ک دوای دوبارە گرانبوون نیازەگان ژیان دەسوەپێ کریا، ڕووژ وە ڕووژ گەوراترەو بوود و ئی جارە مەردوم ڕێژیم کردنە ئامانج و تەنیا هەدەفیان لە ناڕزایەتی نیشاندان هەرزان کردن نییە و وە خاسی ئەڕایان دەرکەفتێە ک بایس و بانی گشت قەیرانەگان ڕێژیم جومهوری ئسلامییە.
لەی ناوە ک باشوور ئێران ها سەر خیاوان، لە ناکاو ساختمان متروپول ئابادان ڕمییەی، ئی ڕووداوە چەن باس تیەرێدە وەرەو. پروپاگاندای ڕێژم و وەلاڕێ بردن زەین مەردوم، موهەندسی سەقەت و گیچەڵەیل نزام موهەندسی ڕێژم، شەڕ دەسەڵات لەناو وەرپرسەیل ڕێژم، ئەهمەیەت نیان وە گیان خەڵق.
ئی ڕووداوە گشت ئەو باسانە لە خوەی گریدەو و مدووی گشتیانیش ڕێژمە، ئەگەر ئەوەیش هەس ک باس لەوە بکریەی ک یە ڕووداوییگ بییە و ڕمیان ئەو ساختمانە هیچ پەیوەندییگ وە دەسەڵات نییە، وەلی دیروک دەسەڵاتداری ڕێژم وە خاسی ئەڕامان دەر خەی ک تەنانەت ئەگەر ڕووداو سرۆشتیگیش ڕوو بیەی لە ئێران، ڕێژم کەیدەی قەیرانییگ ئەڕای وەڕێوە بردنێ ئامانجەگان خوەی، نموونەگانیش فرەن، جوورێ لافاو لوڕستان، زەیولەرزەی کرماشان و دەیان و سەدان نموونەی ترەک.
نزیک وە مانگییگە کە لە شارە باشوورییەگانێ ئێران، هێڵەگانێ ئینترنت بڕیاس و مەردوم ناڕازی نیەتوێنن پەیوەندی بگرن و جنایەتەگان ڕێژم نیشان بییەن، تەنانەت باس لەوە کریەی ک ڕێژیم لە فرەییگ لەو شارەیلە وەگەردێ ئەسلەحە درێد جواو داواکارییەگانیان دەیدەو و هەوڵی ئەڕای سەرکوت کردن فرەترەو بییە وە وەحشیانە ترین شێواز وە نوای مەردوم وساس.
هەر ئیجورە دووخ ئاو و هەوا وە مدووی تەپ و تووز لەی ماوە ژیان و دووخ ڕەوانی ئەو ناوچەیلە شیواندییە و ڕێژیم وە خاسی زانێد کە لە چ وەختییگ توێنێد وە ڕاحەتی سەرکوت بکەید و دووخ ڕەوانی مەردوم جوور گشت دیکتاتورەگانێ ترەک گریدە وەر چەو و ئەگەر ئەوەیکە ڕمیانێ متروپول لە ئابادن سناریۆییگ بوو ئەڕای خەمبار کردن و وە لاڕێ بردن زەین فرەس.
لە لایتریش ڕێژیم شەڕێ میدیاییگ دروس کردێە و بەسییگ لەو کارەساتە وە ئەنقەست شارێدەو و بەش موهەندسی فرەتر زەقەو کردێە و تەنانەت ڕخنە گردن لە دەسەڵات و وەرپرسەیل ئەو شارە ئاسانتر کردێە و وە شێوازییگ درێد بڕیگ لە وەرپرسەیل کەیدە قوربانی.
وە گشتی لە ساختار ڕێژیم جومهوری ئسلامی چاکسازی و باس ئازاد بوونییگ نەیرێد و تەنیا لە بڕییگ زەمان تریبون ئازاد کەی و ئەو قسە و باسەیلییگ ک پێشتر غەدەقە بینە خەیدە ناو کۆمەڵگا تا مەردوم ئەو باسانە بکەن و دریژەی بییەن و وە شێوەی کاتی خەویان لە بوار دەروونی خاڵی بکەن و تەنیا لە چوارچووی چەند رخنەییگ بمینێد و کردەوە لە شوونی نەودن.
ئەگەریش ڕمیان متروپول سناریۆییگ نەود ئەڕای لاپووشانی خۆنیشاندانەگان، وەلی درێد وە خاسی ئستفادە لەو ڕووداوە کەی. ئی کردەوەیل ڕێژیمە هەر بەردەوامە و تا زەمانییگ دیاری کریای جواو دەی وە ڕووی ڕاسی ڕێژم ئەڕای بەش فرەییگ لە کۆمەلگا دەرکەفتیێە و تا ئی ڕێژیمە لەسەرکار بوو، قەیران لە دوای قەیران و کارەسات لە پشت کارەسات تووش مەردوم ئیران بوو و لە وەررایوەرێ ئرادەی خەڵق ئەڕای ئازادی هیچ سناریۆییگ ڕێگر نییە.
