دیار
لە هەر کۆمەڵگاییگ بریگ کەس هەن ک لە ڕەوتێ ڕاسی کۆمەڵگا خوەیان لادەن و جوورێ ئوپورتونیستییگ تەنیا هانە شوونێ بەرژەوەندییەگانێ خوەیان و کەمینەیگن ک وە شێوەی کاتی دیارن و جوورێ لیتاوێ بان ئاون ک وە مەجییگ ئارام لاچن و زوڵاڵی ئاوەگە کەفێدەو دەیشت.
وەی پیشەکییە بایمنە سەر ئەوەیکە وەختییگ لە تاران هەیئەتییگ لە ڕێژیم توای بای سەردانێ کوردستان بکەید، وە ڕاسی لە زەینیان چە گوزەرێ؟ ئامنجیان چەس لە سەفەر وەرەو کوردستان؟
دویکە ڕەئیسی، سەرکۆمارێ ڕێژیم و هەیئەتەگەی سەردانێ پارێزگای ورمێ کردنە و چینەسە شارێ موهاباد و کۆمەلییگ خودفرووشێ کانفورمیست چینەسە پیشوازی ڕەئیسی و دارودەسەی تا لەتە نانییگ وە سەرشووڕی وەدەس بارن.
یادمان نەچوود ک موهاباد پایتەختەگەی جومهوری کوردستانە و شارێ پیشەوا قازی موهەمەدە، شارییگ ک ئەڕای گشت کوردستانییەیل جوورێ قبلەییگە ک بەشییگ ڕنگین لە دیروکیان لەورە نووسریاس و یەکیگ لە پایگایەیێ پاوەگەزدانە لە کوردستان.
وە دڵنیایی وەختییگ داگیرکەر وەرەو کوردستان سەفەر کەی، عەقڵیەتە فاشیستییەگە یەکم خاڵە ک لە زەینی هەس و کوردستان جوورێ ئەسیرییگ ک ها دەس خوەی تماشای کەی، لە لای تریش وە بەردەوامی سیماییگ لە موبارزە و ئازادیخوازی لەرزە خەیدە دڵیان و وە کووم و ترس پا نەننەو ناو خاک کوردستان، چوونکە هێمانیش نەتوێنستنە خوەیان لەی خاکە جیگیر بکەن و دەنگێ نە لە کوردستان وە دژ ئەوان وە بەردەوامی ها ناو گووشیان.
ڕەئیسی و هەیئەتەگەی ناهارییگ خستنەسە کوردستان و جوورێ هەمیشە باکسییگ لە درو و وادەی پووچ وە دیاری ئەڕامان هاوردنە و توینیم بوێسیمن هاتنە بڵاڵنەو و هەرچی ها لە تواناین بکەن تا کوردستان بیدەنگ بوو.
لەی وەزعە ک لە ئێران خەڵق هانە سەر خیاوانەگان و قەیران لە پشت قەیران ژیان تاڵەو کردێە و تاب و تەوانییگ نەمەنییە ئەڕای زوڵم و زوور و ئرادییگ سەرهەڵداس ئەڕای ڕزگاری، ڕێژیم دوارە کەفتیەسە یادێ کوردستان!
ئی یاد کردنە و سەفەرە تەنیا لە ڕوو ترسە، چوونکە ئەوان وە خاسی زانن کوردستانە ک وەگەردێ ماهیەتێ ڕێژیم گیچەڵ درێد و کوردە ک چارەسەری گشت قەیرانەگان لە ڕمیانێ ڕێژیم زانێد و فرەتر لە چل ساڵە هەول دەی تا ئی دەسەڵاتی نارەوا بڕمنێد.
لە لای تریش وەختییگ نووڕیدە ئەو ڕاپۆرت و ڤیدیویەیلییگ ک وڵاوەو بینە لە پیشوازی کردن، وە خاسی ئەڕاد دەرکەفێد ک دوارە کوردستان وەی دەسەڵاتە وەت "نە".
تەنیا کۆمەڵییگ کانفورمیست و خائن وە نیشتمانن ک لەورە بەشدارن و بی شەرمانە وە پرتاڵ کوردی چنە نوای بکوژێ پیشەوا قازی موهەمەد و سرودێ خودفرووشی خوەنن و بەیداخ داگیرکەر بەرزەو کردنە، کۆمەلییگ کەس ک جوورێ بەردە چەویان ها شوونێ دەس داگیرکەر و لە تاریف ئنسان لە هیچ بەشیگە نیەتوێنید جیگیریان بکەید و کرامەت لە زاتیان بوونییگ نەیرێد.
لێرەسە ک داگیرکەر وە زەردەخەنەییگ تاڵ و چاوییگ پڕ لە ترس و دەروونییگ نائارام توای تەلقین بکەید ک ئهساس ئەمنیەت کەی و پا ناسە بان خاک خوەی، وەلی وەختییگ دەروونناسی سیمای ڕەئیسی کەید ک لە فرودگای ورمێ لێدوان دەی، وە خاسی لە دەم وچەوی دیارە ک پڕ وە پووسێ خوەی ئهساس نائەمنی کەی و زانێد نە تەنیا گیان خوەی بەڵکە دەسەڵات ڕێژیمەگەی ها خەتەر.
ئی سەفەرە وەرەو کوردستان وە دڵنیایی ئەڕای چاکسازی و بەرنامە و پرۆژەی سەرخستن نییە، بەڵکە ستارتییگە ئەڕای سەرهەڵدانێ قەیرانییگ ترەک ک ڕێژیم بەرنامەڕیزی ئەڕای کردێە و لە بانانییگ نزیک دەرکەفێد ک چ گیچەڵییگ دوارە ڕیش مەردوم کوردستان گریدەو.
وە گشتی ئەو هیئەتەیلە ک لە ناوڕاس ئێران سەفەر کەن وەرەو کوردستان، لە شەرایت قەیرانە و هاتنە ئەڕای قەیرانسازی ترەک ک وە خیاڵ خوەیان ئرادەی بەرزێ کورد ئەڕای ئازادی بڕمنن و مەننێ دەسەڵات ناڕەوای خوەیان لە جوغرافیای ئێران ئەڕای چەن ساڵی ترەک گارانتی بکەن، چوونکە ڕێژیم جومهوری ئسلامی وە خاسی زانێد و وەرپرسەیلی ڕێژیم فرەجار باس لەوە کردنە ک دەسەڵاتیان تەنیا لە کوردستانە ک جیگیر نەیوە و تەنیا خەتەرییگ ک ئەڕای نەمەنناین هەس لە کوردستان سەرچاوە گرید.
لە لایتریش وە دڵنیایی ئەو خودفرووشەیلە ک پیشوازی کردن وە ڕەئیسی و هیئەتەگەی، نەمایەندەی مەردوم کوردستان نین و وەی کاریانە فرەتر لا جاران سووکەو بین و ئەو ڕووژە توێنن لە زەین خوەیان وێنا بکەن ک نەوەگانێ پێشەوا قازی موهەمەد و ڕێوارەیل ڕێ ئەو ڕەهبەرە سزایان دەن و لەی وڵاتە دەریان کەن.
