لە درێژەی ڕەوتی کاولکاری و بڕینی دارستان و لێڕەوارەکانی کوردستان، کەسانی هەلپەرست دەستیان داوەتە بڕینی دار بەڕووەکانی دەوروبەری "مەریوان" و خەسارێکی گەورەیان بە ژینگەی ئەو ناوچەیە گەیاندووە.
دارستانەکانی "کانی سانان، سەردۆش، پشت تەرخاناوا و کێوی میراجی" ئەو شوێنانەی شاری "مەریوانـ"ـە کە لەم دواییانەدا زیانی ژینگەییان پێ گەیاندووە و دار بەڕووکانی بڕدراون.
هەندێک لەو دارستان و لێڕەوارانە بە مەبەستی خەڵووز دروستکردن، کڕین و فرۆشتن و باخ دروست کردن، لەنێو دەبرێن.
پێشتریش ڕێژەیەکی زۆر لە دارەکانی ڕێگای "مەریوان" بۆ "زرێبار" لەلایەن کەسانی سەر بە ڕێژیم و سپای پاسدارانەوە بە شێوەیەکی بەربڵاو بڕدرابوون و سیمای جوانی ئەو شوێنە گەشتیارییەیان لەنێو بردبوو.
هەروەها دارستان و لێڕەواری گوندەکانی "ئاڵمانە، چۆڕ و نەنە، شێخە کوێرە، دەری و نشکاش، وەسنە، خەیراوا، زەکەریان، قەڵاجێ، هەڵووژان و چۆمی سەوڵاوا" لەلایەن دەستوپێوەندییەکانی سپای تێرۆریستی پاسدارانەوە ئاگریان تێبەردرابوو.
