دەزگای ڕێکخستنی گشتیی حیزبی دێموکرات ڕێوڕەسمێکی بۆ ئەندامانی ئاشکرای حیزبی دێموکرات لە کۆیە بەڕێوە برد، لەو ڕێوڕەسمەدا ڕێز لەو ئەندامانە گیرا کە ٢٠ ساڵە ماندوونەناسانە خزمەت بە حیزب و گەل دەکەن.
ئەو ڕێوڕەسمە بە بەشداریی بەشێک لە ئەندامانی ڕێبەری، کادر، پێشمەرگە، بنەماڵە و ئەندامانی ئاشکرای حیزبی دێموکرات بەڕێوە چوو.
سەرەتای ڕێوڕەسمەکە بە سروودی نەتەوەیی ''ئەی ڕەقیب'' و ساتێک بێدەنگی بۆ گیانی پاکی شەهیدانی کورد و کوردستان دەستی پێ کرد.
دوای بەخێرهاتنی بەشداربووانی ڕێوڕەسمەکە، ''شەهرام حەمیدزادە'' بەرپرسی تەشکیلاتی ئاشکرای حیزبی دێموکرات چەند وتەیەکی لەسەر ئەرک و ڕۆڵی ئەندامانی حیزب پێشکەش کرد.
پاشان سروودێک لەژێر ناوی "قەفەس" پێشکەش کرا.
لە درێژەدا دێکۆمێنتارییەک لەسەر مێژووی کۆمیتەی زاگرۆس و کار و چالاکییەکانی نیشان درا.
لە بڕگەیەکی دیکەی ڕێوڕەسمەکەدا ئەو ژنانەی کە ماوەی ٢٠ ساڵە وەکوو ئەندامی ئاشکرای حیزب هەوڵ و تێکۆشانیان هەبووە ڕێزیان لێ گیرا کە بریتی بوون لە: "شەمسی ئیسماعیلزادە، نەدیفە ئەسەدی، ڕووناک قۆرخی، عیسمەت ڕەسووڵپوور، ڤیان حوسێنی، زیبا ڕەوشەن، سەیران ئیزەتی و ویدا یاری".
دواتر گۆرانییەکی فۆلکلۆر لەلایەن "غوڵام فاتحی" پێشکەش کرا.
ڕێوڕەسمەکە بە شایی و خۆشیی بەشداربووان کۆتایی پێ هات.
