دیار
ڕووژانە وەختییگ هەواڵەگان گەردیمن و شنەفیمن و ناو کۆمەڵگا باس وەلیان کریەی، پڕن لە دەرد و گیچەڵ و گرفت و وەختییگ هەڵسەنگاندن کەیمن هویچ کامیان لەوەی ترەک کەمترین نین و هەر کام وە شێوەییگ ئازارد دەن.
وەختیگیش توای دەس بووەی ئەڕای قەڵەم و بەشییگ لەو ئازارانە خەسار ناسی بکەید و وە شوون مدووەگانی بچید ک بەشکەم بتوێنید ڕێ چارەییگ دیاری بکەید ئەڕای دەرمان دەردەگان، ئەوقەرە فرەن ک نیەزانی لە ستەم نەتەوەیی باس بکەید، ئابووری بخەیدە وەر شیکاری، گرفتە کۆمەڵایەتییەگان دەسنیشان بکەید، هاوارێ سنفەگان بوێدن، مناڵ کار، ماف ژن و... سەدان ستەم ترەک هەن ک هەر کامیان نیاز وە نووڕین دیرن.
ئی ڕووژەیلە گشت مەردومان ئێران وە ناو قەیران و گیچەڵەگان درن دەس و پا دەن و دەقە وە دەقە کرامەت ئنسانیان پایماڵ کریەی و دەس زوورداری دەسەڵاتداری ڕێژیم جومهوری ئسلامی فرەتر چقنێدیانە ناو ئەو قەیرانەیلە ک خوەی دروسیان کردێە.
وەختییگ لە ناو کۆمەلگا گەردید و وەگەرد هەر چین و تەبەقەییگ باس کەید، جیا لە هاوار و ناڕزایەتی و نالە هوێچ باس ترەک نیەشنەفید و ئازارییگ گشت گیاند گرێدە وەر و دەروون پڕ بوود لە هەسرەت.
گرانی!!!
ئەو دەردە ک یەخەی گشتی گردێە و تا باس وەلێ کەیدن، هاوارێ کۆمەلگا هەڵسێدن و هزاران دەرد ترەک وەلێ کەفێدەو دەر.
سیاسەت!!!
باسییگ ک تەمام بەشەگان ژیان لە خوەی گردێەو و وەختییگ نووڕیدە پێ، هزاران ڕخنە لە دەسەڵات بوودە باس و بیزارییگ گەورا لە سیاسەتەگان ڕێژیم گشتی گرێدە وەر، ئازادییەگان وە تەمام باسەگانێ، پرۆژە سیاسییەگان و بەرنامەگان ڕێژیم و وە تایبەتی وەرپرسەیل ڕێژم بینەسە زامبییەلییگ لەوەر چەوێ مەردوم ک جیا لە خوێنخواری و ئازار هیچ وێنەییگ نیەتێدە وەرێ چەو.
هەر کام لە بابەتەگان دەسنیشان کەید، دوینید یەک خاڵ پوزتیو بوونییگ نەیرێ لەی دەسەڵاتە ک جی خوشحاڵی بوودن و ئومیدییگ بەیدە پەید، تەنیا شوعارە و باس لە چارەسەری لە ناو ئی سیستمە تەنیا گەمەییگ سیاسی و گوفتمانییگ پوپولیستییە.
گشت دەردەگان بارنە وەرێ چەو خوەدان و کەمییگ هوێر وەلیان بکەن، ئایا ڕێ چارەییگ دوێننەو؟
بگەردن وە شوونێ مدووەگانیان، ئایا جیا لە ڕێژیم مدووییگ ترەک درن؟
لێرە تەنیا چشتیگ ک ئەڕامان میندەو، ئرادە و هەوڵ دانێ خوەمانە ئەڕای چارەسەری،فرە جار هەر کاممان هوێر وە ئەوە کردیمنە ک تا کەی بایەد ئی نەهامەتیەلە بەردەوام بوو و تاکەییەل فرەییگ ک زەینمان گرێدە وەر.
توینیمن جووری ترەک زەینمان دەرگیر بکەیمن، ئایا خوەمان نیمن ک دریم ئی نەهامەتییەلە قەبووڵ کەیمن، ئێە ک ئی دەسەڵاتە بکوژە، دیکتاتورە و ڕەحمیگ نەیرێ هوێچ شکییک وە ناوی نییە، وەلی لە وەرایوەرێ لە دریژایی دیرۆک ئنسان نیشانی داس ک هوێچ هازسییگ نیەتوێنێد لە وەرایوەرێ ئرادەی ئنسانەگان ئەڕای سەرکەفتن بوسێد.
فرە لە دیکتاتورەیل و دەسەڵاتەیل جەهان لە دیروک لە ئاخرەو وە دەسێ مەردوم لەبەین چینە و یا ناچار بینە بانە سەر داخوازییەگانێ کۆمەلگا، کۆمەلگای مەدەنی ئێڕان وە تایبەت کوردستان خاون ئرادەییگ بەرزە و ساڵیان دریژییگە ک درێد موبارزە کەی و ڕووژ وە ڕووژ هاز و داخوازییەگانی فرەترەو بوود.
لەی بابەتە وە گشتی توێنیمن بوێشیمن ک ئی ڕاسییە هاشا نیەتوێنیمن بکەیمن ک دەرد و ڕەنجەگان تا چوودە نوا فرەترەو بوو و تەنیا ئێمەیمن یانی موردوم ک ئازارییەگانیان وە دەروون و گیانمان دریم کیشیمن و تەنیا ڕێ چارەسەری ها دەس خوەمان و چەوڕێ وسان ئەڕای ناجی و ڕزگاریدەر هویچ دەردییگ دەوا نیەکێدن.
وە دڵنیایی سەرکەفتن ئەڕای ئازادیخوازەیل و مەردومان ستەم کیشیایە و ئرادەی بەرزمان ئەڕای ئازادی تەنیا ڕاسییەگە ک هوێچ دیکتاتور و دەسەڵاتییگ لەوپەڕێ توانا و زوورداری نیەتوێنێد وە نوای بوسێد.
