لە درێژەی شەپۆلی گرانییەکان لە ئێران، ئەمجارەیان هێلکە ڕێکۆردی شکاند؛ هەر شانە هێلکە لە بازاڕ بە ٣٠ هەتا ٣٣ هەزار تمەن فرۆشراوە.
ڕۆژی سێشەممە ١٩ی خەرمانان، لە بازاڕەکانی کوردستان و ئێران هەر شانە هێلکە بە ٣٠ هەتا ٣٣ هەزار تمەن، یانێ هەر هێلکەیەک بە زیاتر لە ١٠٠٠ تمەن فرۆشراوە و بەنیسبەت چەند ساڵی ڕابردووەوە بەرزترین نرخی خۆی تۆمار کردووە.
ئەگەرچی نرخی پەسەندکراوی دەوڵەتی بۆ هەر شانە هێلکەیەک ١٩ هەزار و ٥٠٠ تمەن دیاری کراوە، بەڵام لە هیچ شوێنێک بەو نرخە بەدەستی خەڵک ناگات.
هەندێک لە بازاڕییان و بەرهەمهێنەرانی کێڵگە پەلەوەرییەکان وتوویانە، هۆی سەرەکیی گرانی و چوونەسەرەوەی نرخی هێلکە بۆ دابەزینی بەرهەمهێنانی ئەو بەرهەمە دەگەڕێتەوە.
بەرپرسێکی پەیوەندیدار لەوبارەوە وتوویەتی، لە داهاتوودا نرخی هێلکە چوونەسەرەوەی زیاتر بەخۆوە دەبینێت و دەبێ خەڵک خۆی بۆ گرانتربوونی ئامادە بکات.
هۆکارێکی گرانبوونی هێلکە دەگەڕێتەوە بۆ هەناردەکردنی ناستاندارد و لەڕادەبەدەر لەلایەن مافیاکانی بازرگانیی ڕێژیمەوە بۆ وڵاتانی ناوچەکە و هۆیەکی دیکە، گرانبوون و نەبوونی دانەوێڵە و خۆراکی پێویستی کێڵگە پەلەوەرییەکانە.
لە ماوەی شەش مانگی یەکەمی ئەمساڵدا، شەپۆلێکی نوێی گرانی بازاڕەکانی ئێرانی بەگشتی گرتووەتەوە و خەڵکی کوردستان و ئێران ڕۆژانە شاهیدی ڕەوتی چوونە سەرەوەی نرخی شتومەکە خواردەمەنییەکانن کە ئەمجارە گرانی، هێلکەی کردووە بە زێڕی سپی.
