دوای بڵاوبوونەوەی ڤایرۆسی کۆرۆنا لە ئێران، گومان دەکرێت کە ١٧ لەسەدی کرێکارانی شارەداریی تاران تووشی ڤایرۆسی کۆرۆنا بووبێتن.
٤٤ کەس لە کرێکارانی شارەداریی تاران تووشی ڤایرۆسی کۆرۆنا بوونە و دوو هەزار و ٦١٠ کرێکاری دیکە گومانی تووشبوونیان لەسەرە کە ئەمەش دەکاتە ١٧ لەسەدی هەموو کرێکارانی شارەداریی تاران.
ئەمە لە حاڵیکدایە کە ''موحسێن هاشمی''، سەرۆکی شورای شاری تاران و شوراکانی دیکە ئاگاداری دۆخەکە هەن و لە چوون بۆ سەر کارەکانیان خۆیان دەبوێرن، بەڵام کرێکارەکان ناچارن و دەبێ کار بکەن.
کرێکارانی شارەدارییەکان لە ئێران، بەهۆی نەبوونی خزمەتگوزاریی تەندروستی، لەوانە دەستەوانە، دەمامک و گیراوەی دژەگەند، ناڕەزایەتییان دەربڕیبوو، بەڵام ئەو ناڕەزایەتییانە و داواکاریی کرێکاران لەلایەن بەرپرسانی ڕێژیمەوە پشتگوێ خراوە.
بەهۆی گرانی و هەڵاوسان لە بازاڕەکانی ئێران و داخستنی دووکان و بازاڕەکان لە ماوەی بڵاوبوونەوەی ڤایرۆسی کۆرۆنا، کرێکارەکان بە چوونە سەر کارەکانیان زەرەرمەندترین چینی کۆمەڵگان و لەلایەک هەژاری و لەلایەکی دیکەوە کۆرۆنا هەڕەشەی جیددییە بۆ سەر ژیانیان.
