مامۆستایەک لە شاری سنە بە ماڵپەڕی کوردستان میدیای ڕاگەیاندووە کە لە بەفرانباری ساڵی ٩٩ی هەتاوی ''محەممەد باقر نەوبەخت'' جێگری سەرکۆمار و بەرپرسی ڕێکخراوی پلانداڕێژی و بودجەی ئێران دوای داواکاریی چەند ساڵەی مامۆستایان لە نامەیەکدا بۆ وەزارەتی پەروەردە و بارهێنان و ڕێکخراوی پلاندانان و بودجە نووسیبووی کە ٢١ هەتا ٢٧ لەسەد مووچەکەیان لەژێر ناوی پاداشی تایبەت زیاد بکرێت.
بەڵام دوای چەندین جار هێنان و بردنی ئەو بابەتە لە نێوان مەجلیسی ڕێژیم و وەزارەتی پەروەردە و بارهێنان و ڕێکخراوی بودجە، بڕیار درا کە مووچەی مامۆستایان بەرابەر بە ٨٠ لەسەدی مووچەی مامۆستایانی زانکۆی لێ بێت، بەڵام جێگری وەزارەتی پەروەردە و بارهێنان ئەم بابەتەی وەپشت گوێ خست.
ئەو مامۆستایە باسی لەوە کردووە کە حەوتوویەک لەمەوپێش جێگری وەزارەتی پەروەردە و بار‌هێنانی ڕێژیمی ئیران ڕایگەیاندووە کە ٣٠٠ هەتا ٤٠٠ هەزار تمەن بە مووچەی مامۆستایان زیاد دەکرێت، بەڵام ئەوەش هەتا ئێستا بەکردەیی نەکراوە.
ئەو سەرچاوەیە باسی لەوە کردووە کە بەهۆی دۆخی خراپی ژیانی مامۆستایان و گوێنەدانی بەرپرسانی ڕێژیم، ئەنجومەنەکانی سێنفیی مامۆستایان ڕایانگەیاندووە کە لە ڕۆژانی یەکەمی مانگی ڕەزبەردا مامۆستایانی قوتابخانە لە هەموو شارەکانی کوردستان و ئێران ناڕەزایەتیی خۆیان بە شێوەی مانگرتن دەردەبڕن.
