کوردستان میدیا: مامۆستایانی قوتابخانەکانی پارێزگای لوڕستان، بەهۆی بڕیاری ئیدارەی پەروەردە و بارهێنانی ئەو پارێزگایە، ناڕەزایەتییان دەربڕیوە.
ڕۆژی سێشەممە، ڕێکەوتی ٨ی ڕەزبەر، مامۆستایانی "نێهزەتی سەوادئامووزی"ـی لوڕستان، بەهۆی بڕیاری ئیدارەی پەروەردە و بارهێنانی ئەو پارێزگایە، ناڕەزایەتییان دەربڕی.
ئیدارەی پەروەردە و بارهێنانی پارێزگای لوڕستان بەو مامۆستایانەی وتووە کە ئێمە پێویستیمان بە ئێوە نییە و دەبێ بڕۆنە پارێزگاکانی دیکە و لەوێ وانە بڵێنەوە.
ئەو بڕیارە لە کاتێکدایە کە پارێزگای لوڕستان کەمیی مامۆستای بۆ قوتابخانەکان هەیە و بەشێک لە منداڵان به هۆی نەبوونی مامۆستا ناچار بوونە واز لە خوێندن بێنن.
لە کاتێکدا بەرپرسان و لایەنە پەیوەندیدارەکانی ڕێژیمی ئیسلامیی ئێران باس لە بنبڕکردن و نەهێشتنی نەخوێندەواری دەکەن، زۆربەی قوتابییان لە پارێزگاکانی کرماشان و ئیلام بەهۆی بێ ئیمکاناتییەوە دەست لە خوێندن هەڵدەگرن.
لە ئەمساڵدا ١ ملیۆن و ٢٠٠ هەزار قوتابی لە ئێراندا دەرس دەخوێنن، بەڵام ئەو قوتابییانە لەگەڵ کێشەی کەمیی مامۆستا و قوتابخانە بەرەوڕوون.
بەشێکی زۆری مامۆستایانی قوتابخانەکانی ئێران بە شێوەی "حق التدریس" کار دەکەن، ئەوەش کێشەیەکی دیکەی قوتابخانەکانی ئێرانە.
نەبوونی مامۆستا و قوتابخانە، نەبوونی پێداویستیی خوێندن و نەبوونی بەرنامەیەکی تۆکمە و دارێژراو بۆ خوێندن لە کوردستانی ڕۆژهەڵات، تەنها ئامانجێکە کە ڕێژیمی ئیسلامیی ئێران چەندین ساڵە بەدوایەوە وێڵە و کاری بۆ دەکات کە سەرئەنجام کێشەیەکی لەبن نەهاتووی بۆ بەشی خوێندن لە کوردستانی ڕۆژهەڵات دروست کردووە.
