کوردستان میدیا

ماڵپەڕی ناوەندیی حیزبی دێموکراتی کوردستانی ئێران

مامۆستایەیل پاوەگەزدان

23:43 - 3 بانەمەڕ 2722

دیار

لە درێژەی دەسەڵاتداری ناڕەوای ڕێژیم دیکتاتوری جومهوری ئسلامی، هەر لە یەکم ڕووژەگان ک ناخ و عەقڵیەتێ ئی ڕێژیمە ئەڕای مەردومان ئێران دەرکەفت تا ئیسکە، نەتەوەگان ناو جوغرافیای ئێران، قشرەگان و سنفەگان و هەر بەشییگ لە کۆمەڵگای مەدەنی لە ڕییەیل جیاواز هەوڵدانە ک ناڕزایەتی خوەیان لەی سیستمە نیشان بییەن و لە وەرایوەرێ زوڵمەگان ڕێژیم جومهوری ئسلامی بیدەنگ نەون.

یەکیگ لە قشر و سنفەیلییگ ک لە یەکەم ڕووژ تا ئێرنگە بەردەوام بیینە و بیدەنگ نەوینە و هەمیشە ناڕزایەتی خوەیان نیشان دانە مامۆستایەیلنم ک جوورێ قشرییگ خاون فکر و پیشڕەو هەمیشە هەوڵدانە تا مافەگان خوەیان و گشت کۆمەڵگا وە دەس بارن.

وە پەی چالاکی و مانگرتن و ناڕزایەتی و بەردەوامی لە وەرگرتن ماف، توێنیم بوێشیمن ک ئەو سنفە لە کۆمەڵگای ئێران، مامۆستا و پیشڕەو موبارزەی مەدەنی و مامۆستای پاوەگەزدانن.

لەی ناوە ماموستایەیل مەدرسە و زانکو لە کوردستان وە نسبەت نەتەوەگان ترەک ناو جوغرافیای ئیران، باسیان جیاوازە و جوورێ چالاکیی و کار و کردەوەگان ترەک لە موبارزە وەگەردێ ڕێژیم، ک هەمیشە کوردستان جیاواز بییە، مامۆستایەیلیش لە کوردستان وە پەی عەقڵیەتێ موبارزاتی ک لە وڵاتەگەمان زاڵە، بەردەوامن لە موبارزە ئەڕای وەدەس هاوردنێ مافەگانیان.

گشت ساڵییگ لە دریژەی ساڵ، ئەڕای یەکجاریش بییە مامۆستایەیل مانگرتن داشتنە و کەفتنەسە شوێن داخوازییەیل خوەیان و لە وەرایوەرێ زوڵم بیدەنگ نەیونە و تەنانەت داواکاری گشتگیر و لە ڕاسای بەرژەوەندی نیشتمانی گشت قشر و تەبەقەگانێ ناو کۆمەڵگا داشتنە و درن.

هەر ئەوجوورە ک باس کردیمن کۆمەڵگای هوشیارێ کوردستان ک لە خەبات ئەڕای ئازادی و مافخوازی پیشڕەوە باسیگ جیاوازە وە نسبەت نەتەوەگانێ ترەک و لەی ناویشە مامۆستایەیل پارێزگای کرماشان لە چالاکترین بەشەگانێ کۆمەڵگای کوردەواریێن و ئیسکەیش هەر بەردەوامن و هەزینەی فرەیی لە دەرکردن لە کارەگانیان و زندانی و شکەنجە وە خوەیانەو دینە و هێمان بیدەنگ نەوینە و لە ڕووژەیل لەیەوەریش هەم دوارە وە خڕەو بوین لە وەردەمێ ئدارەی ئاموزش و پەروەرش کرماشان داوای مافەگان خوەیان کەن و بڕیار دانە خیاوانەگان چووڵ نەکەن تا وە مافەگانیان بڕەسن

لە داخوازییە سەرەکییەگانێ مامۆستایەیل: ناکارەمەییی و چارەسەری سیستم پەروەردەیییە لە ئێران، ئازاد کردنێ مامۆستایەیل زندانی، قەیرزانی و ئەرزش دانان ئەڕای ئەو سنفەسە، چارەسەری مووچە و مەعیشەتە و...

لە ئێران وە پیچەوانەی وڵاتەیل پێشکەفتێ و دموکراتیک ک مامۆستایەیل لە قشرەیل کاری و سەرەکی وە هساو تییەن و وڵاتەگان گشت هەوڵییگ دەن تا مامۆستایەیل کەم و کەسری نیاشتوون، چونکە لەو وڵاتەیل ڕوانینیان وە نسبەت مامۆستا جیاوازە و جوورێ سنفییگ نووڕنە پەی ک نەسڵەگانێ بانان پەروەردە کەید و لە ڕاسی ئەوانن ک بانانێ وڵاتەگان لە ڕێ پەروەردەی مناڵەگان دیاری کەن، وەلی وە داخەوە لە ئێران، لاوازترین و پڕ گیر و گرفت تەرینێ سنفەگان مامۆستایەیلن ک کەمترین ئمتیاز درن و لە ساختار پەروەردەیی ڕێژیم فاشیستی جومهوری ئسلامی نەک ئێرنگە بەڵکە بانان و پێشکەفتن هوێچ ماناییگ نەیرێدن و جوورییگ داڕسیاس ک وە پەی ئیدئولوژی فاشیستی و ئایینی دەسەڵات بوود و لە راسی بەرنامەی پەروەردەییان دویا کەفتنێ کۆمەڵگاس.

لەی ناوە ک مامۆستایەل لە وەرایوەرێ ئی سیستمە بیدەنگ نین، بینەسە بایس یە ک ڕێژم وە ئرادەیان بترسێد و موبارزەی مەدەنیان وە سەرکوت و زندانی جواو بییەی.

لە دریژەی ساڵ لە شارەگان کوردستان وە ڕیژەییگ فرەتر وە نسبەت شوێنەگان ترەک مامۆستایەیل تیەنە سەر خیاوانەگان و ئەوەیش بیەسە مدووی ئەوەیکە ئی ڕێژیمە جوور هەمیشە داخوازییەگان ئەمنیەتیەو بکەید و دەس بکەیدە کەلەپچە کردنێ مامۆستایەیل ناڕازی، ک ئیجارە مامۆستایەیل کوردستان وە تایبەتی کرماشان، بڕیار دانە ک بەردەوام بوون و هوێچ فشار هەڕەشەییگ بیدەنگیان نەکەیدن.

وە گشتی ئرادە و بەردەوامیی مامۆستایەیل کوردستان و ئەندیشەی مافخاوزی ئی قشرە مەکتەبیگە ئەڕای گشت بەشەگان کۆمەلگای کوردەواری و گشتمان ئەرکداریمن پاڵپشتی وەلیان بکەیمن و نەیلیمن مامۆستایەیل وە تەنیا بمینن، چونکە ماف و داخوازی ئەوان داخوازی گشت کۆمەڵگاس و گشت سنف و قشرەگان دەس بیەنەو دەس یەک کۆمەڵگاگەمان سەرکەفێدن.