نوێنەرانی ڕێژیمی ئێران لە مەجلیس لە دانیشتنێکی فەرمیدا، ڕۆژی دووشەممە ١٥ی بانەمەڕ، ڕەشنووسی چاکسازیی یاسای دراو و بانکیی ئێرانیان بە زۆرینەی دەنگ پەسند کرد.
بەپێی ئەو ڕەشنووسه، یەکەی دراوی ئێران لە ڕیاڵەوە دەگۆڕدرێت بۆ تمەن و چوار سیفر لە دراوی ئەو وڵاتە دەسڕدرێنەوە.
پەسەندکردنی ڕەشنووسی سڕینەوەی چوار سیفر و چاکسازیی یاسای دراو، تا دەگاتە بواری جێبەجێ کردنەوە، ٥ ساڵ دەخایەنێت.
بەپێی قسەی شارەزایانی بواری ئابووری، ڕێژیمی ئیسلامیی ئێران بۆ خۆدەربازکردن لە کۆنترۆڵکردنی هەڵاوسان و داڕمانی یەکجاریی ئابووریی خۆی، ئەو ڕەشنووسەی پەسەند کردووە.
مانگی گەلاوێژی ١٣٩٦ی هەتاوی، بەرپرسانی ڕێژیمی ئێران لە دانیشتنێکی فەرمی بە سەرۆکایەتیی "حەسەن ڕووحانی"، سەرکۆماری ڕێژیم، بڕیاری لابردنی ڕیاڵیان لە دراوی ئێران و جێگیرکردنی تمەن وەک دراوی فەرمی دا، کە هەنووکەش بە کردەوەیی نەکراوە.
بەپێی ئەو گەڵاڵەیە ڕێژیم یەکەی پارەی تمەنی فەرمی کرد و بەرانبەر بە ١٠ ڕیاڵ ڕاگەیەندرا.
بەرپرسانی ڕێژیم ڕایانگەیاندووە کە بۆ بەرزكردنەوەی بەهای پارەی وڵاتەكەیان، پارەی فەرمیی ئەو وڵاتەیان لە ڕیاڵەوە کردووە بە تمەن.
کێشەی ئابووری و داڕمانی ئابووریی ڕێژیم بەهۆی گەمارۆوە ئابوورییەکانەوە، سیستمی ئابووریی ئەو وڵاتەی تووشی شەلەل کردووە.
