کوردستان میدیا: پاشای عەرەبستان داوای لە ئێران کردووە، دەست له خراپکاری و دەستێوەردانەکانی لە ناوچەکەدا هەڵ بگرێت.
"مەلک سەلمان"، پاشای عەرەبستان، ڕۆژی پێنجشەممە، ٩ی جۆزەردان، لە دانیشتنی بەپەلەی شۆرای هاوکاریی کەنداودا، ئێرانی بە هەڕەشەیەکی جیددی، بۆ سەر تەناهیی جیهانی ناو لێ بردووە و ئەو ڕێژیمەی بە دەستێوەردان و خراپکاری لە ناوچەکەدا تاوانبار کردووە.
سەلمان هەروەها وتوویەتی: "کۆماری ئیسلامی لە کاروباری نێوخۆیی وڵاتانی ناوچەکەدا دەستێوەردان دەکات، بەرنامەی ناوکیی خۆی پەرە پێ دەدات و ئازادیی بواری گواستنەوە لە ڕێگا ئاوییەکان دەخاتە مەترسییەوە".
پاشای عەرەبستان، داوای لە کۆمەڵگای جیهانی کردووە، تا لە دەستێوەردانەکانی ئەو ڕێژیمە لە کاروباری وڵاتانی دیکەدا، بەڕێکردنی "تێرۆریستە ناوچەیی و نێودەوڵەتییەکان" و "هەڕەشە بۆ سەر کەشتیڕانی لە ئاوە نێودەوڵەتییەکاندا" پێشگیری بکەن.
هەروەها عەرەبستان و هاوپەیمانەکانی داوایان لە ئێران کردووە، ڕێز لە سەروەریی وڵاتانی عەرەبی بگرێت.
"عەباس مووسەوی"، وتەبێژی وەزارەتی دەرەوەی ڕێژیمی کۆماری ئیسلامیی ئێران، ئەو تۆمەتانەی بە "گاڵتەجاڕ" ناو بردووە و بە توندی ڕەتی کردووەتەوە.
لە بەرانبەردا، "عادڵ جەبیر"، وەزیری ڕاوێژکاریی سیاسەتی دەرەوەی پاشای عەرەبستان وتوویەتی: ئاوا ڕەتکردنەوەی ئەو تاوانانە "جێی پێکەنینە".
