ڕۆژی چوارشەممە ڕێکەوتی ٢٩ی بانەمەڕ خەڵکی شارۆچکەی نەڵۆس بەنیسبەت کردەوەی شارەوانیی شاری شنۆ و نەڵۆس ناڕەزایەتییان دەربڕی.
ماوەیەکی زۆرە شارەداری شنۆ کێشەی لەگەڵ نەبوونی شوێنی تایبەت و بێ کێشە بۆ زبڵی ئەو شارە و گوندەکانی شارۆچکەی نەڵۆس بەرەوڕوویە و بۆ ئەو مەبەستە شوێنێکی لە "شاخەکانی کانی شیلانـ"ـی شارۆچکەی نەڵوس دیاری کردووە.
شوێنی دیاریکراو شوێنێکی گونجاو و باش بۆ ئەو مەبەستە نییە و سەرەڕای دروستکردنی سیمایەکی ناحەز بۆ ڕێگای هاتوچۆی نێوان شنۆ و پیرانشار، دەتوانێت زیان و خەسارێکی زۆر بە زەویی کشتوکاڵی و ژینگەی ئەو ناوچەیە بگەیەنێت.
هەروەها بەهۆی نزیکبوونی ئەو شوێنە بە شارۆچکەی نەڵۆس دەتوانێت مەترسییەک بێت بۆ سەر تەندروستی و گیانی خەڵک.
