بەناو نوێنەری شاری زاهیدان لە مەجلیسی ڕێژیم باسی لەوە کردووە کە لە هەندێک لە ناوچەکانی "سیستان و بەلووچستانـ"ـدا نرخی بێکاری زیادی کردووە و لە نێوان ٤٠ تا ٦٠ لەسەددایە.
"عەلیم یارمحەممەدی"، بەناو نوێنەری شاری زاهیدان لە مەجلیسی ڕێژیمدا وتوویەتی: "لە کۆشکی قەند و نەیشکەردا نرخی بێکاری نزیکەی ٦٥ لەسەد و لە چابەهار و زاهیداندا گەیشتووەتە سنووری ٤٠ لەسەد".
ناوبراو هەروەها زیادی کردووە کە لە "ئێرانشار" نزیکەی ٤٠ لەسەد و لە زاهدان ٢٠ تا ٢٥ لەسەدی خەڵک بێکارن.
سیستان و بەلووچستان یەکێک لە بێبەشترین پارێزگاکانی ئێرانە کە ڕێژیم لە چوار دەیەی ڕابردوودا کەمترین سەرمایەدانەریی دەوڵەتیی تێدا ئەنجام داوە و جگە لە بێکاریی بەربڵاوی خەڵک، ئەو پارێزگا لەگەڵ کەمیی ناوەندە دەرمانی و فێرکارییەکانیش بەرەوڕوویە.
ئەو نوێنەرەی ڕێژیم هەروەها دانی بەوەدا ناوە کە ئامارەکان نیشان دەدەن کە لەو ناوچانەدا نە پیشە و نە کشتوکاڵ بوونی نییە.
"یارمحەممەدی" هەروەها وتوویەتی کە نەبوونی پێشکەوتن و بێکاری لە بەشگەلێک لەو پاریزگایە لە جیهاندا بێوێنەیە.
خەڵکی پارێزگای سیستان و بەلووچستان یەکێک لە پارێزگا پەراوێزخراوەکانی ئێرانە و ڕێژیم هیچ ئاوڕێک لە دۆخی خەڵکی ئەو پارێزگایە ناداتەوە و تەنانەت ئەگەر خەڵکانێکیش ناڕەزایەتی دەربڕن لەگەڵ سەرکوتی ڕێژیم بەرەوڕوو دەبنەوە.
