لە چەند ڕۆژی ڕابردوودا لە ڕووداوی ئاگرکەوتنەوەی زەویی کشتوکاڵییەکانی گوندی ''ئازاد'' سەر بە ناوچەی مەحاڵی مەهاباد، نزیکەی ٣٠ هێکتار گەنم لە ئاگردا سووتا.
ئەوە لە حاڵێکدایە کە نزیکەى مانگێکە خەڵک و جوتیاران لەسەر کارەساتى لەم شێوەیە هۆشداریی دەدەن، بەڵام گرینگی پێنەدانی بەرپرسانى ڕێژیم لەو شارە بووەتە هۆى سووتانى ئەو زەوییانە.
هەموو ساڵێک بە هاتنی وەرزی گەرما سەدان هێکتار لە زەوییە کشتوکاڵییەکان و دارستانەکانی کوردستان ئاگریان تێبەر دەدرێت کە بەو هۆیەوە بەشێکی زۆر لە ژینگە و سروشتی کوردستان لەنێو چووە.
بەشێکی زۆری ئەو ئاگرکەوتنەوانە لە ڕاستای سیاسەتەکانی ڕێژیمی ئێران بە مەبەستی لەنێوبردنی ژینگە و سروشتی کوردستاندایە کە زەرەر و زیانێکی بەرچاوی به ژینگەی کوردستان و خەڵکی ناوچەکە گەیاندووە.
