كه‌ریم په‌رویزی
ڕۆژێك یان ڕه‌نگه، شه‌و و نیوه‌شه‌وێك، ژنێك له شوێنێكی ئه‌م جیهانه، یان به‌رته‌سكتری بكه‌ینه‌وه، ئه‌م كوردستانه، ژان ده‌یگرێ و چه‌ند كه‌س له خزم و كه‌سوكار به‌ده‌ورییه‌وه ده‌بن و منداڵێك له‌دایك ده‌بێ. هه‌ر كه‌سه‌و نیگه‌رانی ئه‌وه‌یه كه دایكه‌كه به سڵامه‌تی له‌و ژانه ببێته‌وه و منداڵه‌كه‌ش بێ كێشه بێته دونیاوه. گه‌وره‌ترین خه‌م و نیگه‌رانی له‌و ده‌مه‌دا، به‌سڵامه‌تی ده‌ربازبوونی دایك و منداڵه‌كه‌یه له‌و قۆناخه دژوار و سه‌خته؛ كه یه‌كه‌م قیژه‌ی منداڵه‌كه به گوێی خزمان گه‌یشت، هه‌موو هه‌ناسه‌یه‌كی ئاسووده ده‌رده‌ده‌ن و به‌ده‌م گریانی منداڵه‌كه‌وه پێده‌كه‌نن.
له‌و ده‌مه‌یدا كه ساڵی ١٣٠٩ی هه‌تاوی، له درێژترین شه‌وی ساڵدا، له ورمێ، بنه‌ماڵه‌ی خاوه‌ن پێگه‌ی گوندی قاسملوو، له ماڵی موحه‌مه‌دئاغا كۆببوونه‌وه و چاوه‌ڕێی هاتنی منداڵێك بوون، ته‌نیا بیریان له‌وه ده‌كرده‌وه كه دایك و منداڵه‌كه به سڵامه‌تی له‌و قۆناخه تێبپه‌ڕن و كه‌س له بیری ئه‌وه‌دا نه‌بوو كه ئه‌م منداڵه داهاتووی چۆن ده‌بێ!
له دوای ئه‌و شه‌وه كه درێژترین شه‌وی ساڵ بوو، تاكوو ئێستا ٩٠ شه‌و له‌و جۆره شه‌وانه، واته ٩٠ یه‌ڵدا و درێژترین شه‌وی ساڵ تێپه‌ڕیوه و به‌داخه‌وه كه ڕۆڵه‌ی له‌دایكبووی یه‌ڵدا، له یه‌كێك له شه‌وه‌كانی درێژترین ڕۆژه‌كانی هاویندا به ده‌ستی تیرۆریستانی نێردراوی ویلایه‌تی فه‌قیهی نیشته‌جێی تاران شه‌هید بوو، به‌ڵام ئه‌وه‌ی ژیاوه و ده‌ژی، هزر و ڕوانگه و بیروباوه‌ڕه‌كانی ئه‌و ڕۆڵه‌ی نیشتمان و مه‌كتبه فیكرییه‌كه‌یه‌تی كه نه‌ك ته‌نیا له گوندێكدا قه‌تیس نه‌مایه‌وه، به‌ڵكوو كوردستان و ئێرانی گرته‌وه و ده‌نگدانه‌وه‌ی نێونه‌ته‌وه‌یی هه‌بوو.
دوكتور قاسملوو كه له درێژترین شه‌وی ساڵدا له‌دایك بوو، به كرده‌وه و تێكۆشان و هزر و باوه‌ڕی، ده‌یه‌ویست شه‌وی درێژ له‌سه‌ر كوردستان دوور بخاته‌وه و تاریكیی داسه‌پاو به‌سه‌ر نیشتماندا بڕه‌وێنێته‌وه و به تیشكی هه‌تاو نه‌ته‌وه و نیشتمان ڕووناك و گه‌رم بكاته‌وه و سه‌وزه‌ڵانی و ئاوه‌دانی و ژیان به‌رهه‌م بێنێ.
دوكتور قاسملووی بلیمه‌ت، سه‌دان زمانی ده‌زانی نه‌ك ته‌نیا زمانه‌كانی وه‌كوو ئینگلیسی و فه‌رانسه‌وی و... به‌ڵكوو زمانی گرووپ و ده‌سته و چین و توێژی جیاوازی كۆمه‌ڵگا جیاوازه‌كان. هه‌م له زمانی مامۆستایانی زانكۆی پاریس و دیپلۆماته‌كانی ئاڵمان شاره‌زا بوو و هه‌م له زمانی جوتیار و كرێكار و كاسبكاری كورد و سه‌ربازی تورك و ئه‌فسه‌ری فارس و وه‌زیری عه‌ره‌ب و ده‌یان و سه‌دان گرووپ و توێژی دیكه‌ی كۆمه‌ڵگاكان و به‌هه‌موو ئه‌و زمانانه نه‌ك شتی جیاوازی نه‌ده‌گوت، به‌ڵكوو له هه‌موویاندا به‌دوای یه‌ك ڕه‌گ و یه‌ك ڕێگای به‌ره‌و به‌خته‌وه‌ری و ئازادی و دادپه‌روه‌ریی كوردستان و سه‌روه‌ریی نه‌ته‌وه‌ی كورد ده‌گه‌ڕا.
ئه‌وه‌ی ڕۆڵه‌ی له‌دایكبووی شه‌وی یه‌ڵدا، بونیاتی نا، ئێستا مه‌كته‌بێكی به‌رز و به‌رفراوان به به‌رینایی كوردستانه و سه‌رچاوه‌ی هێزگرتن و هزرینه بۆ ڕۆڵه‌كانی ئه‌م نیشتمانه كه ده‌یانهه‌وێ ئازاد، سه‌ربه‌ست و یه‌كسان له‌سه‌ر خاكی خۆیان به سه‌روه‌رییه‌وه بژین.
یه‌ڵداتان پیرۆز.
