کوردستان میدیا: ڕۆژنامەنووس و نووسەرێکی کورد خەڵکی شاری ئیلام دوو خەڵاتی ئەدەبی وەرگرت.
بەپێی ڕاپۆرتی ڕۆژنامەی "گاردیەن"، بێهروز بووچانی ڕۆژنامەنووس و نووسەری کورد خەڵکی شاری ئیلام، کە ماوەی نزیک بە ٦ ساڵە، لە دوورگەی مانۆسی وڵاتی ئوسترالیا دەژی، توانی دوو خەڵاتی بەناوبانگی نێونەتەوەیی بە دەست بێنێت.
نووسەر لە بەشی وێژەیی ناچیرۆکی خەڵاتی ڤیکتۆریەن پریمری بە بڕی ٢٥ هەزار دۆلار و لە بەشی وێژەیی خەڵاتی ڤیکتۆرین بڕی ١٠٠ هەزار دۆلاری بردەوە.
بۆچانی ماوەی نزیکەی ٦ ساڵە لە دوورگەی مانۆس زیندانییە و دەوڵەتی ئوسترالیا مۆڵەتی چوونە دەرەوەی لەو دوورگەیە پێ نەداوە.
هەر لە ماوەی مانەوەی لە دوورگەکەدا، نووسەر ڕۆمانێکی لە ژێر ناوی "هیچ هاورێیەک جگە لە شاخەکان" بڵاو کردووەتەوە.
ناوبراو سەبارەت بەو ڕۆمانە دەڵێت: "ئەم کتێبە بەرهەمی ٥ ساڵ زیندان و ئەشکەنجە بووە " و پرسیار دەکات "ئایا کوردەکان بێجگە لە شاخەکانی دۆستێکی دیکەیان نییە؟"
لە رۆمانەکەیدا بووچانی باس لە هەڵسوکەوتی نەشیاو بەرامبەر خۆی لە ماوەی ئەو ٥ ساڵەی ڕابردوودا، لە زیندانی دوورگەی مانۆس دەکات.
بێهرووز بووچانی نزیکەی شەش ساڵ له‌مه‌و‌به‌ر لە ئێراندا تووشی گرفت بوو و کوردستانی ئێرانی بەجێهێشتووە. له‌م شەش ساڵەدا له سه‌ر ئه‌م که‌مپه کاری ڕۆژنامه‌وانی و مافی مرۆڤی کردووه و لە ڕۆژنامه نێونه‌ته‌وەییەکانی وەک ڕۆژنامەی "گاردیه‌ن" و "هافینگتۆن پوست" بابەت دەنووسێ.
