بەناو نوێنەرانی خەڵک لە مەجلیسی ڕێژیمی ئێران خەریکی تاوتوێکردنی گەڵاڵەیەکن بە مەبەستی زۆرکردنەوەی حەشیمەتی وڵات و بوونی منداڵی سێیەم و چوارەم لە بنەماڵەکاندا.
بەناو نوێنەرانی مەجلیس گەڵاڵەیەکیان پێشنیار کردووە و تاوتوێی دەکەن کە ئەو دایک و باوکانەی کە منداڵی سێیەم و چوارەمیان ببێت، لە پاڵاوتنگە و کارخانەکانی پێترۆشیمیدا پشکیان بۆ دیاری دەکرێت.
بەپێی ئەو گەڵاڵەیە ئەو پشکە لەژێر ناوی "پشکی داهاتوو"دا بەو دایک و باوکانە دەدرێت. ئەمە لەحاڵێکدایە کە بوورسی ئێران تووشی قەیران بووە و ڕێژیم لەو ڕێگایەوە دەیهەوێت کەمیی فرۆشی نەوت لە بوورسدا قەرەبوو بکاتەوە.
هەروەها نوێنەران دەیانهەوێت کە ناوەند و ڕێکخراوە جیاوازەکان کە بۆ زۆرکردنەوەی حەشیمەت کار دەکەن بخەنە ژێر سێبەری ناوەندێکەوە بە ناوی "ناوەندی میللیی حەشیمەت".
ڕێژیم لەحاڵێکدا پلان بۆ زۆرکردنەوەی حەشیمەت و بنەماڵەتەوەر کردنەوەی کۆمەڵگا دادەڕێژێت کە دۆخی ئابووری و بژێویی ژیانی خەڵک نالەبارە و تەنانەت ئاماری پێکهێنانی ژیانیش لە ئێراندا بە شێوەیەکی بەرچاو دابەزیوە.
