دیار
وە خەیر نای ئەڕای بیکارترین شار
هاتییدە فلاکەت و ژاری و نەهامەتیمان وە نزیکەو بوێنید.
ئێرە گەوەرا شارییگە ک هەر سووکایەتی وە پێ کەین.
ئێرە دەوڵەمەنە وە دیل گیریاگەس.
ئێرە ئەو پارێزگاسە ک هەشت ساڵ وە مدووی شەڕ ئێوە، خاپوور کریا.
ئێرە بناغەی کوردەوارییە ک وە ئاسمیلاسیون و کوشتن و بڕین و ژینوساید تواین دەمی بوەسین.
هاتی وە بی پرس چوونکە خوەد وە خاون زانید، وەلی بزان لێرە کەس تو نیەناسێد و هەرچی بوێشید نیشانەیگید لە خودا، ئێمە وە نیشانەییگ لە شەیتان ناسیمنەد.
تو نیشانەی نەهامەتی و دویاکەفتن و زوڵم و زوورید.
هاتیدە بزانید جوانەیل ئی شارە تا چەنییگ کەفتنە شوون مادە هوشبەرەگان ئێوە.
هاتیدە جوورێ هەمیشە سروەت و سامان ئی وڵاتە تاڵان بویەید و بچیدە ناوڕاسێ ئێرانەگەد ئەڕای خوەشی خوەد و پەیڕەوگاند وە کاریان بوەید.
ئەڕی ڕەئیسی، ئێمە دی ناسیمنەد و زانیمن ئەڕای چە وەرەو کوردستان تیەید، زانیمن ک جیا لە شەڕ هوێچ خەیرییگ وە ڕێدەو نییە و هەرچەن نیەزانیمن ئی جارە بەرنامەدان ئەڕای ئازار و کوشتن و بڕین ئێمە چەس، وەلی وە خاسی دیارە چە تواید.
فرەتر وە چل ساڵە ک تیەین و وە ناو خودا و خەیر، ئەوەی زوڵم بوود لە مەردومانە کەین و ڕێدان گرینەو چینە کاخەگاندان و وە زەردەخەنە قەشمەری وە پێمان کەین.
خاس زانیید لەی شارە تا چەنییگ نەهامەتی ک ئێوە دروسی کردینە مل ئی مەردومانە گردێە، خاس زانید لە وەرێ چەومان سەرمایەگانمان بەن و لە شارەگانێ خوەدان کەینەی کاخ و لە کەربەلا و نەجەف تەڵاکاری کەین.
ئێرنگە هاتییدە و باس لەوە کەید پروژە ئەرای ئاوەدانی دێرم!!!
نە دی نیەتوێنید وەی قسەیلە بخەڵەتێنیدەمان، نیەتوێند خوەد وە خاس نیشان بیەید و جوورێ ناجی باید ئەڕای دەوای دەردەگانمان، چوونکە تونید مدووی هەرچی دەردە.
هاتیدە و گەردید، خاس بنووڕ ک چە وە پێمان کردینە، تماشای مناڵە کارەگانمان بکە، بیکارەگان دوێنید لە گووشەی خیاوان؟
ئەو جوانەیلییگ ک سەریان کەفتیەسەو خوار و گیروودەی مەواد بینە دوێنید؟
گڕ ئاگر نەفتەگەمان دوێنید ک تەنیا زەردییەگەی بەش ئێمەس و سەرمایەگەی چوودە گیفاندان.
لە زەین خوەد ڕەئیسی هەڵسەنگاندنیگ لەبەینێ کرماشان و شارەگان خوەدان بکە، خاس دیارە ک چەنییگ خستینەسەمانە دویا.
ئەو زەردە خەنەیلییگ کەید ک وەختییگ چەوییگ خەیدە دەرو و وەرد لەی شارە، خاس زانیمن ک تواید چە بوێشید.
ناتیایدیش لە زویەو پەیامەگەدان ڕەسیەسە پێمان.
ئایا کارییگ مەنیە بکەن، دەردییگ مەنیە وەسەرمان بارن، چشتییگ مەنیە بدزنەی.
ئێمە ک دی هویچ شک نیەوەیمن.
وەلی بچوورەی وە ڕەهبەرەگەد بویش، هەرچییگ وەسەریان تیەریمن، یانە هەر کورد و سینە دەنە نوا، بوێشە ڕهبەرەگەد هەرچییگ وەلێان کوشیمن یانە هەم دوارە سەرهەڵدەن و ج
وور دار بەڕوو هەر قورس و قایم وسانە.
بویشە ڕەهبەرەگەد ئرادەییگ ک لە کوردستان هەس، هیچ زوڵم و زورییگ چاری نیەکەیدن و ئێمە سەرمان بەرزە و ئەڕای ئازادی گیان دەیمن.
بوێشە ڕەهبەرەگەد هازییگ ک ها لە کوردستان کەمەر بەساس ئەڕای لەبەین بردندان و چەوەڕی بوون هاوار و توانامان ملدان بگرێد و تەقاس بسنیمن.
بوێشە پەی کرماشان پایتەختەگەی کوردستانە و نەک ئێوە بەڵکە هزاران جار لە ئێوەیش زاڵم تر نیەتوێنێد ئی شارە و
گشت کوردستان داگیر بکرید.
بوێشە ڕهبەرەگەد، ک سزنیمن هەر سەوزەو بوون، کوشیمن وە دی تیەن، دزیمن هەر دەوڵەمەنن، یانە نەتەوەی ڕخەو نەچینن.
ئەڕێ ئبراهیم ڕەئیسی، هاتیدە کرماشان وە خاسی ئەڕاد دەرکەفت ک کوردستان کوورەس، ئێرە ئرادەیان جوورێ کوێەگان کوردستان بەرز و قایمە و جوورێ دار بەڕیو پادانەسەو گەز.
