دۆخی سەقز بەهۆی نەبوونی کەرەستەی پزیشکی بۆ پێشگرتن لە کۆرۆنا و هەروەها کەمتەرخەمیی کاربەدەستانی ڕێژیمی ئێران بەنیسبەت دابین‌نەکردنی کەلوپەلی پزیشکی هەڕەشە لە گیانی هاووڵاتییان دەکات.
لە سەقز دۆخی شارەکە ئاوارتەیە و پێداویستیی پزیشکیی زۆر کەمە و ڕێژیمیش هەتا ئیستا هیچ هەوڵێکی نەداوە.
نەخۆشخانەکانی سەقز پڕ بووە لە نەخۆشی تووشبوو بە کۆرۆنا و لە ئێستادا هیچ نەخۆشێکی ڕاناگرن؛تەنانەت ژمارەیەک لە پەرستار و دوکتورەکان بەهۆی نەبوونی پێداویستیی پزیشکی نەخۆشخانەکانیان بەجێهیشتووە.
لەو شارە دۆخەکە بەهۆی کۆرۆناوە زۆر شپرزەیە و هەتا ئێستا چەندین هاووڵاتیی گیانیان لەدەست داوە.
خەڵک لە شاری سەقز خۆیان دەستبەکار بوونە و شەقام، گەڕەک و کۆڵانەکان بە دەرمانی دژەگەند دەپڕژێنن.
هاووڵاتییان باس لەوە دەکەن، بەهۆی ئەوەیکە خزمەتگوزاری و کەلوپەلی پێویستی پزیشکی بۆ نەخۆشیی کۆرۆنا لە نەخۆشخانەی سەقز دابین ناکرێت، ئەگەری هەیە کادرە دەرمانییەکانی ئەو نەخۆشخانەیە تووشی کۆرۆنا ببن.
کاربەدەستانی ڕێژیمی ئیسلامیی ئێران بەنیسبەت هەواڵ و زانیارییەکان لەبارەی نەخۆشیی کۆرۆناوە خۆ دەبوێرن و ڕاستییەکان لە خەڵک دەشارنەوە.
