بەدوای بارینی بارانی بە لێزمە، لە پارێزگای ورمێ سێڵاو هاتووە و خەسارێکی بەرچاوی بە زەویی کشتوکاڵی خەڵک گەیاندووە.
بەپێی زانیارییەکان سێڵاوێکی قورس لە شارۆچکەی سیلوانا و گوندەکانی دەوروبەری هاتووە و چەندین پردی بچووک و خانووی هاووڵاتییانی خراپ کردووە.
لەنێو شاری ورمێ شەقام و کۆڵانەکان تووشی ئاوگرتوویی بوونە و هاتوچۆی خەڵک بە دژواری ئەنجام دەدرێت.
هەروەها لە شنۆ بەهۆی هاتنی سێڵاو خەسارێکی زۆر بەر زەویی کشتوکاڵی گوندنشینەکان بە تایبەت گوندی "سەوجە" گەیشتووە و چۆمی نێو شاری "شنۆ"ش لافاوێکی زۆری پێدا دێتە خوارەوە.
هۆکاری سەرەکیی پێگەیشتنی خەسار بە زەوی و زاری خەڵک بەهۆی هاتنی سێڵاو دەگەڕێتەوە بۆ: "هەڵگرتنی لەڕادەبەدەری خیز لە چۆمەکان، جۆماڵنەکردنی جۆگەکان بەر لە هاتنی سێڵاو، لەنێوبردنی گیا و گوڵ، بڕینی دارستانەکان و کێڵانەوەی لێڕەوارەکان لەو ناوچانە کە مەترسیی هاتنی سێڵاویان تێدا زۆرە".
هەر ساڵە لە پارێزگای ورمێ بەهۆی هاتنی سێڵاو خەسارێکی زۆر بە مڵک و ماڵی خەڵک بە تایبەت گوندنشینان دەکەوێت.
