كه‌ریم په‌رویزی
ده‌نگهه‌ڵبڕین و ناڕه‌زایه‌تی نیشاندان لای ده‌سه‌ڵاتدارانی سه‌ره‌ڕۆ وه‌كوو تاوانێكی گه‌وره چاوی لێ ده‌كرێ كه شیاوی هه‌رجۆره سزایه‌كه! سه‌ركوتكار و تاوانبارانی وه‌كوو خامنه‌یی و سیستمی پڕ له دڕنده‌یی وه‌كوو سیستمی ویلایه‌تی فه‌قیهی، حه‌زیان لێیه كه هه‌موو كه‌س گوێڕایه‌ڵ و ملكه‌چ بێ و كه‌س ده‌نگی نه‌شازی لێ ده‌رنه‌یه‌ت.
ئه‌و كاته‌ی كه كۆمه‌ڵگا جووڵه‌یه‌كی دژ به ویسته دڵخوازه‌كانی حكومه‌تی تۆتالیته‌ر ئه‌نجام ده‌دا، وه‌كوو پارازیتێكی گه‌وره‌یه له‌سه‌ر مێشك و بیری چه‌قبه‌ستووی ده‌سه‌ڵاتداران و به نه‌شیاوترین شێوه دژكرده‌وه نیشان ده‌ده‌ن، هه‌روه‌كوو له كوشتاری خه‌زه‌ڵوه‌ری ئه‌مساڵدا، ئه‌وپه‌ڕی دڕنده‌یی و ناخی دژه‌مرۆییان ده‌رخست.
به‌ڵام كۆمه‌ڵگاش ته‌نیا یه‌ك ڕێگا و یه‌ك شێوازی نییه بۆ كرده‌وه و ناڕه‌زایی نیشاندان، به‌ڵكوو هه‌ر كۆمه‌ڵگایه‌ك ڕێگای نوێ و تایبه‌تی خۆی ده‌دۆزێته‌وه تاكوو دیكتاتۆر به‌چۆكدا بێنێ.
له‌م ڕۆژانه‌دا كه سیستمی كۆماری ئیسلامی به‌ره‌و ئه‌وە ده‌چێ تاكوو به شانۆگه‌رییه‌كی دیكه، هه‌ندێ سیمای ده‌سكرد و ده‌سته‌مۆ له سندووقه پڕ له فرتوفێڵه‌كانی به‌ناو هه‌ڵبژاردنه‌وه ده‌ر بێنێ و وه‌كوو ئه‌ندامی مه‌جلیسی ڕێژیم به خه‌ڵكیان بناسێنێ، دووباره هه‌ندێك باسی كۆن و چه‌ندپاته هاتوونه‌ته‌وه ئاراوه.
سه‌ره‌ڕای هه‌موو ڕابردووی پڕ له گزه و درۆی ڕێژیم و سه‌ره‌ڕای ئه‌زموونی چوار ده‌یه كه نیشانی داوه مه‌جلیس له‌م سیستمه‌دا ته‌نیا نمایشێكه كه ئێسته ته‌نیا به پاسداره‌كان ڕێگا ده‌ده‌ن تێیدا به‌شدار بن، هه‌ن كه‌سانێك كه ده‌ڵێن ته‌نیا ڕێگامان ئه‌وه‌یه كه له ڕێگه‌ی هه‌ڵبژاردنه‌وه هه‌وڵی وه‌ده‌ستخستنی هه‌ندێ شت بده‌ین، ده‌نا جگه له‌وه ڕه‌وتی سیاسی به‌ره‌و توندوتیژی ده‌ڕوا و وڵات ده‌كه‌وێته ئاگره‌وه و ... و بیانووی دیكه دێننه‌وه بۆ ملكه‌چییه‌كی دیكه.
ده‌نگی دیكه‌ش هه‌یه كه پێی وایه بایكۆت كردن هیچ له پرسه‌كان ناگۆڕێ و ڕێژیم هه‌ر مۆره‌كانی خۆی ده‌نێرێ و بایكۆتكردن كاره‌كه بۆ ڕێژیم ئاسان ده‌كاته‌وه و باشتره هێشتا له نێوان خراپترینه‌كان و زۆر خراپترینه‌كاندا پێش به ویستی ڕێژیم بگرین!
به‌ڵام ڕاستیی ڕووداوه‌كه ئه‌وه نییه، به‌ڵكوو به‌شدارینه‌كردن له ده‌نگدان به جه‌للاددا هاوارێكی دیكه‌ی كۆمه‌ڵگایه كه به شێوازی دیكه ده‌ری ده‌بڕێ. له وڵاتێكدا كه ده‌سه‌ڵاتی مرۆڤكوژ، ته‌نیا له زمانی هه‌ڕه‌شه تێ ده‌گا و ته‌نیا كوشتن به ڕێگه‌ی چاره‌سه‌ركردنی كێشه‌كان ده‌زانێ، بایكۆتكردنی شانۆگه‌رییه‌كانی ده‌توانێ كۆشكی پووشاڵیی دابڕمێنێ.
بێده‌نگیی كۆمه‌ڵگا له ڕۆژی دیاریكراو بۆ به‌ڕێوه‌چوونی هه‌ڵبژاردن، به چه‌ندین شێوه ده‌توانێ ده‌رببڕدڕێ و به هه‌موو جیهان نیشان بدا كه چیدی فرتوفێڵ و چه‌واشه‌كارییه‌كانی ئه‌م ڕێژیمه خه‌ڵك به‌لاڕێدا نابا.
وه‌كوو شاملوو له زمانی مارگۆت بیكله‌وه ده‌ڵێ، بێده‌نگی پڕه له نه‌وتراوه‌كان. ئه‌م بێده‌نگییه‌ی خه‌ڵك له ڕۆژی ٢ی ڕه‌شه‌مەدا ده‌توانێ هاوارێكی پڕبه‌گه‌روو و زایه‌ڵه‌ی مێژووی ویستێكی ڕه‌وا بێ. بێده‌نگیی به‌رفراوان له هه‌موو شاره‌كاندا به شێوی مانگرتنی سه‌رتاسه‌ری یان چۆڵكردنی شار له‌و ڕۆژه‌دا، ده‌توانێ گه‌وره‌ترین هاوار بێ كه مێشكی سه‌ری دیكتاتۆر پڕ بكا له ده‌نگدانه‌وه و زایه‌ڵه‌ی داڕمانی سیستمه ڕزیوه‌كه‌ی.
