خەڵکی هەژار و بێدەرەتانی گوندەکانی سیستان و بەلووچستان سەرەڕای نەبوونی هیچ ئیمکانات و خزمەتگوزارییەکی پەروەردەیی و تەندروستی، بێئاویش تەنگی پێ هەڵچنیون.
بەپێی ئامارەکانی ڕێژیم، ٨١ لەسەدی گوندەکانی "دەشتیاری" و "چابەهار" لە ڕێگەی تانکەر و سەتڵەوە ئاوی پێویستی خۆیان دابین دەکەن و ناتەندروستبوونی ئاو لەو گوندانە ڕۆژانە قوربانی دەگرێت.
نەبوونی ئاو لە گوندەکانی ئەو پارێزگایە خەڵکی ناچار کردووە کە بۆ دابینکردنی ئاوی خواردنەوەیان ڕوو بکەنە چۆم و ڕووبارەکان و بەو هۆیەوە چەندین کەس بە تایبەتی منداڵان لەنێو ئاودا خنکاون.
نەبوونی ئاو تەنیا کێشەی خەڵکی سیستان و بەلووچستان نییە و ساڵانێکە خەڵک لەگەڵ چەندین کێشە و گرفتی سەرەکی بەرەوڕوو بوونەتەوە و هەتا ئێستا هاواری خەڵکی ئەو پارێزگایە بە هیچ ئیدارە و ناوەندێکی ڕێژیمی ئێران نەگەیشتووە و ئەو پارێزگایە یەکێک لە هەژارترین و بێ ئیمکاناتترین پارێزگاکانی ئێرانە.
