كه‌ریم په‌رویزی
هه‌ندێك ده‌سه‌ڵاتی سیاسی هه‌یه كه له كاتی پێناسه‌كردندا ده‌توانی وه‌كوو سیستمی دێموكراتیك یان نیمچه دێموكراتیكیان پێ بڵێی یان بڵێی ئه‌م سیستمه تۆتالیته‌ره یان پاوانخوازه. پێناسه‌كردنی سیستمی سیاسیی حاكم به سه‌ر وڵاتێكدا چوارچێوه‌‌یه‌كی گشتی و زێهنیه‌تێكی گشتگیر دروست ده‌كات و چاوه‌ڕوانیت له‌و سیستمه ئه‌وه ده‌بێ كه كردارێكی چاوه‌ڕوانكراو له چوارچێوه‌ی وه‌ها پێناسه‌یه‌ك بكا؛ به‌ڵام بۆ ڕێژیمی كۆماری ئیسلامی ناتوانی وه‌ها پێناسه‌یه‌كی بۆ بكه‌ی، چوونكه كرداره‌كانی ئه‌م ڕێژیمه له‌و چوارچێوانه‌دا جێ ناگرن و له‌ڕاستیدا گه‌ر وه‌های پێناسه بكه‌ی، چاوه‌ڕوانییه‌كت له لا دوست ده‌بێ كه پێتوایه ئێسته له‌م بواره‌دا ئه‌م ڕێژیمه ئاوه‌ها ده‌كات، كه‌چی جۆرێكیتر له كرداری لێ ده‌بینی!
به‌ڕوونی بڵێین، ڕێژیمی كۆماری ئیسلامی ته‌نیا ده‌توانی پێناسه‌ی "كه‌لاوه"ی بۆ بكه‌ی. چوونكه نه‌ك له بواری سیاسی و ئابووری و كۆمه‌ڵایه‌تییه‌وه هه‌م وڵاتی وێران كردووه و هه‌م خودی ده‌زگای حاكمیه‌تیش بۆته وێرانه‌یه‌كی ته‌واو، به‌ڵكوو له كرده‌وه و گوتاری ڕێژیمیشدا كه‌لاوه‌یه‌كی وێران به‌ته‌واو مانایه.
باسی داڕمانی سیستمی ئابووری و سیاسییه‌كه‌ی له‌لایه‌ك و باسی داڕمانی ئه‌م ڕێژیمه له‌به‌رده‌م ڤیرووسی كۆرۆنادا له‌لایه‌كی دیكه ڕاوه‌ستێ كه خودی وه‌زیری ته‌ندروستیی ڕێژیم ده‌ڵێ له‌به‌رامبه‌ر كۆرۆنادا شكستیان خوارد به‌ڵام ئه‌وه‌ی ڕوونتر له هه‌مووكات به‌رچاوه، هه‌ڵوێست و كرداری ڕێژیم له بڕگه زۆر هه‌ستیار و ڕووداوه چاره‌نووسسازه‌كاندایه كه ته‌نیا ده‌توانی پێی بڵێی ڕێژیمێكی كاول!
كه‌لاوه‌بوونی ئه‌م ڕێژیمه ئه‌وكاته به‌ڕوونی دیاره كه به‌رپرسی په‌روه‌نده‌ی چه‌كه ناوكییه‌كانی كه پاسدارێك بوو به‌ناو فه‌خریزاده، ده‌كوژرێ و به‌رپرسانی ڕێژیم نازانن كه چۆن كوژراوه و چی ڕووی داوه!؟ هه‌ركامه‌یان سێناریۆیه‌ك باس ده‌كه‌ن و دوایه‌ش بێده‌نگیی لێ ده‌كه‌ن!
له بنكه‌ی ناوكیی نه‌ته‌نزه‌كه‌یان كه ده‌یان میلیارد دۆلاریان تێدا هه‌زینه كردووه و به‌بۆنه‌ی ئه‌و په‌روه‌نده‌وه، سه‌دان میلیارد دۆلار زه‌ره‌ر له ئابووریی وڵاتیان داوه و سه‌دان میلیارد دۆلاریان له گه‌مارۆكان به بۆنه‌ی دوو بنكه‌ی وه‌كوو نه‌ته‌نزه‌وه تووش بووه، كه‌چی له‌كاتی ته‌قینه‌وه و وێرانكرانی نه‌ته‌نزدا، سه‌رانی ڕێژیم نازانن چی ڕووی داوه و هه‌ركامه‌یان شتێك ده‌ڵێن و له كۆتاییشدا ناوی نه‌فه‌رێك دێنن و ده‌ڵێن ئه‌و نه‌فه‌ره كاره‌كه‌ی كردووه و له فڕۆكەخانه‌كانی ئێرانیشه‌وه چۆته ده‌ره‌وه‌ی ئێران!
یان جێگری فه‌رمانده‌ی سوپای تیرۆریستیی قودسیان ده‌مرێ و سوپای پاسداران ده‌ڵێ به ڕاوه‌ستانی دڵ مردووه، وته‌بێژه‌كه‌یان ده‌ڵێ به نه‌خۆشیی شیمیایی مردووه، كه‌سی دیكه‌یان ده‌ڵێ به دڵنیاییه‌وه شه‌هید بووه! ته‌نانه‌ت نازانن فه‌رمانده گه‌وره‌كانی تیرۆریسته‌كانیان چۆن مردووه!؟
له بڵاوبوونه‌وه‌ی په‌تای كۆرۆناشدا، وه‌لیی فه‌قیه به‌وپه‌ڕی بێشه‌رمییه‌وه ده‌ڵێ ڤاكسه‌نی كۆرونای بیانی ناكڕن و چه‌ند مانگ دواتر سه‌ركۆماری ڕێژیم ده‌ڵێ له دوو حه‌وتوودا ده‌بێ به میلیۆنان ڤاكسه‌ن لێ بده‌ین و به‌شی چه‌ندین ساڵ ڤاكسه‌ن بكڕین له ده‌ره‌وه! ئیتر چیرۆكی ده‌زگای موسته‌عانی سوپای پاسدارنیش كه ده‌یانوت به فرێكانس و فڵان ڤیرووسه‌كه مه‌ودایه‌ك دووردا ده‌دۆزێته‌وه، له‌ولاوه ڕاوه‌ستێ كه گه‌وره‌ترین فڕوفیشالی مێژووی زانست بوو!
هه‌موو ئه‌م ڕووداوانه پێمان ده‌ڵێن كه كار له‌وه تێپه‌ڕیوه ناوێك و پێناسه‌یه‌كی ستاندارد، ته‌نانه‌ت وشه‌ی دیكتاتۆری و پاوانخوازیش بۆ ئه‌م ڕێژیمه به‌كار ببرێ و ته‌نیا وته‌نیا پێناسه‌ی "كه‌لاوه" ده‌رخه‌ری نێوه‌ڕۆك و هه‌روه‌ها سیمای ڕاسته‌قینه‌ی ڕێژیمی حاكم له تارانه.
