بێهزاد قادری
وێڕای ئەوەی کە بەرپرسانی باڵای ڕێژیمی ئیسلامیی ئێران هەڕەشەی سەرکوتکردنیان لە خەڵک کردووە، بەڵام هێشتا خۆپیشاندانەکان کە بەهۆی بەرزبوونەوەی ٣٠٠ لەسەدیی بێنزین دەستی پێکرد، بەردەوامە. بەپێی ڤیدیۆ و وێنە بڵاوکراوەکان لە تۆڕە کۆمەڵایەتییەکاندا، خۆپیشاندەران لە شارە جیاجیاکانی ئێران، لەوانە: تاران، ئیسفەهان، کەرەج، تەورێز، کرماشان و شیراز و هەروەها شارەکانی کوردستانی ڕۆژهەڵات، لەوانە: سنە، مەریوان، جوانڕۆ، کرماشان، بۆکان، ئیلام و سەقز، هاتوونەتە سەر شەقامەکان. هەروەها هەواڵەکان باس لەوە دەکەن کە چەندین کەس لە خۆپیشاندەرانی کورد شەهید بوونە و بە دەیان کەس بریندارن.
بەپێی بڕیاری سێ دەزگای "دادوەری، یاسادانان و بەڕێوەبەریـ"ـی ڕێژیمی ئێران، نرخی بێنزین لە ئێوارەی ڕۆژی هەینی، ٢٤ی خەزەڵوەر، بە ڕێژەی ٣٠٠ لەسەد بەرز بووەوە و لە ١٠٠٠ تمەن بۆ ٣٠٠٠ تمەن هەڵکشا. ئەمە بووە هۆی دەستپێکی ناڕەزایەتیی سەرتاسەری و دروشمەکانی ئەم خۆپیشاندانانە، تەنیا لە گرانبوونی بێنزیندا بەرتەسک نابێتەوە و لە هەنووکەدا، ڕێبەری ڕێژیم و ویلایەتی فەقیهیشی کردووەتە ئامانج و ئەمانە پیشاندەری ڕق و کینی پەنگخواردووی خەڵکی وەزاڵەهاتووی ئێران و کوردستانە.
بە وتەی خودی میدیاکانی ڕێژیم و میدیاکانی نزیک لە سپای تێرۆریستی پاسداران، لە زۆرتر لە ١٠٠ ناوچەی ئێران و کوردستان، خۆپیشاندان هاتووەتە ئاراوە و تا ئێستا (دووشەممە، ٢٧ی خەزڵوەر) بەردەوام بووە. هەروەها دەیان بانک، پۆمپی بێنزین، ناوەندی حکوومەتی و ماشینی سەرکوتکەرانی ڕێژیم لەلایەن خەڵکەوە سووتێنراون.
ڤیدیۆکان باس لەوە دەکەن کە وێڕای حوزووری هێزە سەرکوتکەرەکان بە جلی کەسییەوە، لە "کەرەجـ"ـدا، خۆپیشاندانەکان تا تاریکایی شەو درێژەی هەبووە. لە تاران و ئیسفەهان، شۆفیرانی ناڕازی، بازاڕەکان و گەورەڕێگاکانی ئەم شارانەیان بەستووە. هەروەها لە تەورێز و تاران، خوێندکارانی زانکۆکان پەیوەست بە خۆپیشاندانەکان بوونە و چەندین پلاکاردی جۆربەجۆریان بۆ دژایەتیکردن لەگەڵ گرانی بەدەستەوە بووە و دروشمی ئەوەیان داوە کە "خوێندکار زیندووە".
هەروەها ڕێژیم قوتابخانە و زانکۆکانی داخستووە تاکوو قوتابییان و خوێندکاران بە خۆپیشاندەرانەوە پەیوەست نەبن، بەڵام ئەم هەوڵەشی نەزۆک ماوەتەوە. خوێندکارانی زانکۆی تاران، ئێوارەی ڕۆژی یەکشەممە بە کۆبوونەوە لەبەر دەرگاکانی هاوتەریب لەگەڵ شەقامی ئینقلاب، ئەم دروشمانەیان داوە و هەڵوێستیان پێشان داوە: "خوێندکار ئاگایە، زانکۆ بەخەبەرە"، "ئێمە پشتیوانی ئەم خۆپیشاندانەین" و "خوێندکار، کرێکار، ڕاوەستاوین لە سەنگەر" و...
بەڵام لە کوردستان دۆخەکە ئاڵۆزترە و سەرکوتکەرانی ڕێژیم بەتوندی خەڵکی ناڕازی سەرکوت دەکەن و لە شارەکانی مەریوان، جوانڕۆ، سنە، کرماشان و بۆکان و... دەیان کەس شەهید بوونە و دیان برینداریش هەیە. هەواڵەکان باس لەوە دەکەن کە شەهیدەکان بە تەقەی ڕاستەوخۆی هێزەکانی ڕێژیم کراونەتە ئامانج. لەو خۆپیشاندانانەدا، "عوسمان نادری" و "بێهرووز مەلەکی" لە مەریوان، "موبین عەبدوڵڵاهی"، "کاوە محەممەدی" و "ئیبراهیم مورادی" لە جوانڕۆ و "شلێر دادوەند" لە بۆکان و چەند هاووڵاتییەکی دیکە کە شوناسیان ناڕوونە، لە شارە جیاجیاکانی کوردستاندا شەهید کراون. هاوکات منداڵێکی تەمەن ١٣ ساڵە بە ناوی "هیوا نادری" خەڵکی مەریوان و چەندین کەسی دیکە بەتوندی بریندار بوونە.
بەڵام ئەم سەرکوت و کوشتن و بڕینانە خەڵکی بێدەنگ نەکردووە. بانکەکانی "میللی، سادرات و ئەنسار" لە مەریوان، وێران کراون. هەروەها پۆمپی بێنزینی "خاوەری" و پۆمپی بێنزینی "کاوە کۆنەپۆشی"، ناسراو بە "کاوەی شێخ برا" کە ئەندامی سپای تێرۆریستی پاسداران لە مەریوانە، ئاگری تێبەردراوە. هەروەها لە شارەکانی دیکەی کوردستاندا، چەندین بانک، پۆمپێ بێنزین، ناوەندی ڕێژیم و ماشینی هێزەکانی ڕێژیم، لە ئاگردا سووتێنراون.
ئەم خۆپیشاندانانە لە حاڵێکدا بەردەوامە کە خودی ڕێبەری ڕێژیم، هەڕەشەی لە خەڵک کردووە و پشتیوانیی لە گرانبوونی بێنزین کردووە و وتوویەتی: "دەبێ بێنزین گران بکرێت". لە هەمان کاتدا، ناڕازییانی بە ئاژاوەگێڕ و "ئەشرار" ناو لێبردووە کە دژی ئینقلابن و دەبێ سەرکوت بکرێن. هەروەها سەرۆکی دەزگای بەناو دادوەریی ڕێژیم وتوویەتی کە دەبێ بە شێوازێکی توند لەگەڵ ناڕازییاندا هەڵسوکەوت بکرێت. وەزارەتی ئیتلاعاتیش لە بەیاننامەیەکدا ڕایگەیاندووە: "سەرکوتی ئەشرار ئەرکی ئێمەیە". ئەمانە شتانێکی سەیر نییە و ڕێژیمی ئیسلامیی ئێران هەمیشە لەگەڵ کپکردنی دەنگی ناڕازیی خەڵک بووە و سەرکوت پیشەی هەموو کاتی بووە. بەدڵنیاییەوە هەر هەستانەوەیەکیش بە بەڵای گیانی خۆی دەزانێت، بۆیە بە دڕندانەترین شێواز بەرەوڕووی دەبنەوە.
سەرکوتەکانی ڕێژیم تەنیا لە تەقەی ڕاستەوخۆدا کۆتایی پێ نایەت، بەڵکوو ئینتێرنێت و هێڵی مۆبایلی لە خەڵک پچڕاندووە، تاکوو خەڵک نەتوانن پێکەوە پەیوەندی بگرن و دەنگیان و ئەو هەموو توندوتیژییەی ڕێژیم بگەیەننە جیهانییان. هەروەها ڕێژیم پەیوەندییەکانی دەرەوەی لەگەڵ ئێران پچڕاندووە تاکوو ئاسانتر خەڵک سەرکوت بکات. ئەم نەمانی ئینتێرنێتە، زانیارییەکانی لە پێش چاوی جیهانییان شاردووەتەوە و تا ئێستا ئامارێکی ورد لە کوژراو و بریندارەکانی ئێران و کوردستان لەبەر دەستدا نییە.
وێڕای ئەم خەفەقانانە، ئامارە نافەرمییەکان باس لەوە دەکەن کە نزیکەی هەزار کەس لە ئێراندا بەگشتی دەسبەسەر کراون و ١٥٠ بانک و ناوەندی حکوومەتی ئاگریان تێبەردراوە و سەدان کەسیش بریندار بوونە و دەیان کەسیش کوژراون. لە هەمان کاتدا، دەیان سەرکوتکەر کوژراون و بریندار بوونە.
لەم نێوانەدا، ناوەندی هاوکاریی حیزبەکانی کوردستانی ڕۆژهەڵات پشتیوانیی لە ئەم خۆپیشاندانانە کردووە و ئەم ناڕەزایەتییانەیان بە ڕەوا زانیوە. حیزبی دێموکراتی کوردستانی ئێرانیش لە چەندین ڕاگەیەندراودا پشتیوانیی لە دەنگی مافخوازیی خەڵک کردووە و بەڕێز "مستەفا هیجری"، لێپرسراوی گشتیی حیزبی دێموکرات، داوای لە خەڵک کردووە کە درێژە بە خۆپیشاندان بدەن؛ ناوبراو ڕایگەیاندووە: "هەموو خەڵکی دنیا پشتیوانتانە، دەنگمان لەگەڵ دەنگتانە و دڵمان لە لاتانە".
ناوەڕۆکی ئەم بابەتە ڕا و تێبینیی نووسەرە و ماڵپەڕی کوردستان میدیا لێی بەرپرسیار نییە.
