کوردستان میدیا: مانگرتن و ناڕەزایەتیدەربڕینی کرێکارەکانی هەفت‌تەپە و فوولادی ئەهواز بەردەوامە؛ زۆربوونەوەی گوشارەکان و هەڕەشەکان تەنیا ڕێژەی ناڕازییانی زیاتر کردووەتەوە.
ڕۆژی سێشەممە، ٦ی سەرماوەزی ١٣٩٧ی هەتاوی، کرێکارەکانی هەفت‌تەپە و فوولادی ئەهواز، سەرەڕای هۆشدارەکان و هەڕەشەکانی ناوەندە ئەمنییەتییەکان و هەروەها بەرپرسی هێزی بەناو دادوەریی ڕێژیم، درێژەیان به ناڕەزایەتییەکانی خۆیان دا.
ئەم کرێکارانە لەسەر داواکارییەکانی خۆیان لەمەڕ دانی مووچە دواکەوتووەکانیان و ئازادکردنی هاوکارە دەستبەسەرکراوەکانیان سوورن.
یەکیەتیی ئازادی کرێکارانی ئێرانیش باسی لە هەڕەشەی کرێکارەکان کردووە؛ هەندێک کەسی نەناسراو لە ڕێگەی موبایلەوە پێوەندییان به کرێکارەکانەوە کردووە و هەڕەشەیان لێ کردوون، کە لە ئەگەری بەشداریکردن لە ناڕەزایەتییەکاندا، دەستبەسەر دەکرێن.
هەر لەم پێوەندییەدا، خانەنشینکراوەکانی تاران لە بەرانبەر بینای وەزارەتی تەعاون، کاروباری کۆمەڵایەتیدا کۆبوونەوەی ناڕەزایەتییان بەڕێوە برد و ئامادە نەبوون لەگەڵ نوێنەرانی وەزارەتخانەکەش قسە بکەن.
ئەوان لەو کۆبوونەوەیەدا خوازیاری گرینگیدانی بەرپرسانی ڕێژیم به خواستەکانیان و هەروەها ئازادکردنی مامۆستایانی دەسبەسەرکراو بوون.
ئەوان بە نووسینی درووشمگەلێکی وەک: "هێڵی هەژاری ٦ میلیۆن، مووچەی ئێمە ٢ میلیۆن"، "سفرەی ئێمە خاڵییە" و "مامۆستای بەندکراو دەبێ ئازاد بکرێت"، درێژەیان به ناڕەزایەتی دا و خوازیاری جێبەجێکردنی داخوازەکانی خۆیان بوون.
ناڕەزایەتیدەربڕینەکانی کرێکارانی هەفت‌تەپە پێی ناوەتە ٢٣ـەمین ڕۆژی خۆیەوە و ئەوان لەسەر داوا ڕەواکانی خۆیان بەردەوامن.
