لەدرێژەی بایکۆتکردنی هەڵبژاردنەکانی ڕێژیمی ئێران، لەلایەن حیزب و لایەن چین و توێژە جیاوازەکانەوە، پێنج ڕێکخراوەی ژنانی غەیرە فارس لە بەیاننامەیەکدا هەڵبژاردنەکانی ڕێژیمی ئێرانیان بایکۆت کرد.
لەو بەیاننامەیەدا هاتووە: "ئێمە ٥ ڕێکخراوەی ژنانی نەتەوەکانی ژێر زوڵم و زۆریی ڕێژیمی ئیسلامیی ئێران، بە ناوەکانی: "ناوەندی ژنانی کوردستانی ئێران، دەنگی ژنانی ئەحواز(نبراس)، دامەزراوەی هەمدلین بانکان، کۆمیتەی ژنانی ڕێکخراوی داکۆکی لە مافی مرۆڤی تورکەمەن سەحرا و ناوەندی ژنانی تورک" شانۆی هەڵبژاردنەکانی ١٤٠٠ی هەتاوی بایکۆت دەکەین.
سەرکوت و زوڵمی نەتەوەکانی ژێر ستەمی ڕێژیمی ئێران دووبەرابەره و هەتا ئاستێکی زۆر بەرزە، بە شێوازێک کە بارودۆخیان وێنا ناکرێت.
هەروەها هەڵاواردن و زوڵمی چەند شێوەی "ڕەگەزی، نەتەوەیی و ئایینی" و هەتا دوایی کە حاشا لە بوون و مانی ژنان دەکات و توندوتیژیی سیستماتیکی حکوومەتی ، جێبەجێکردنی بە ئەنقەستی دواکەوتوویی ئابووری، کۆمەڵایەتی، سیاسی و کولتوری بووە بە پشکی ژنان لەو سیستمە دەسەڵاتدارییەدا.
ئەوان هەروەها ڕایانگەیاندووە ئێمە باوەڕمان وایە، ڕێژیمی ئێران، لە هەر شێوەیەکدا، ناتوانێ وڵامدەری ویست و داخوازییەکانی کۆمەڵگەی ئێران بێت.بەڵکوو لەو باوەڕەداین بە ڕووخان و تێپەڕبوون لەو ڕێژیمە، دەتوانین کۆمەڵگەیەکی ئازاد، سێکۆلار، یەکسان و فیدراڵ بۆ هەموو گەلانی ئێران بەتایبەت بۆ ژنان دابین بکەین.
ئێمە داوا لە سەرجەم ژنانی نەتەوەکانی ژێر ستەمی ڕێژیمی ئیسلامیی ئێران دەکەین کە بە شۆڕشێکی نەتەوەیی و ئەرکی سیاسی و کۆمەڵایەتیی خۆیان بە بەشداریـنەکردن لە هەڵبژاردنەکاندا و "نا" بە کۆماری ئیسلامیی ئێران و سەرجەم تاوانەکانی ئەو شانۆیەی ڕێژیم بگۆڕین بۆ ناڕەزایەتیی سەرانسەری.
