کوردستان میدیا: هەڵبژاردنەکانی پارلەمانی عێراقی فێدراڵ، بە بەشداریی نەتەوەکانی ئەو وڵاتە ئەمڕۆ بەڕێوە دەچێت و خەڵک دەنگ بە بەربژێری خۆیان دەدەن.
پـرۆسەی دەنگدان بۆ هەڵبژاردنەکانی پارلەمانی عێراق، ئەمڕۆ شەممە ڕێکەوتی ٢٢ی بانەمەڕێ ١٣٩٧ی هەتاوی، بەڕێوە دەچێت و پێشتریش لە چەندین شاری وڵاتانی دیکە، دەنگدەران، دەنگیان بە بەربژێری خۆیان داوە.
لەو هەڵبژاردنانەدا، هاووڵاتییانی عێراق بەگشتی و هاونیشتمانیانی باشووری کوردستان بەتایبەتی نوێنەرانی خۆیان بۆ چوار ساڵی داهاتوو دەنێرنە پارلەمانی عێراق.
هەڵبژاردنی پارلەمانی عێراق بەم شێوەیە:
- چوارەمین هەڵبژاردنی پارلەمان لە ٢٠٠٣ەوە
- هەڵبژاردنەکە بۆ ٣٢٩ کورسی پارلەمانە
- ٢٥%ی کورسییەکان واتە ٨٣ کورسییان بۆ ژن دەبن
- ٩ کورسییان بۆ کەمینەکان دەبن
ـ٥ کورسی بۆ مەسیحییەکان
- هەریەکە لە کوردانی ئێزدی، شەبەک و فەیلی کورسییەک و سابیئەکانیش کورسییەک
ـ ٦٩٨٢ بەربژێر لە ٨٧ لیستدا ڕکابەری دەکەن
ـ ٢٠١١ بەربژێریان ژنن
کورد لەو هەڵبژاردنانەدا بە ٧ لیست بەشداری دەکات کە بریتین لە:
-پارتی دێموکراتی کوردستان
-یەکیەتیی نیشتمانی کوردستان
-بزووتنەوەی گۆڕان
-هاوپەیمانی بۆ دیموکراسی و دادپەروەری
-یەکگرتووی ئیسلامی
-کۆمەڵی ئیسلامی
-نەوەی نوێ
دەنگدانەکان بەم شێوەیە:
دەنگدانی گشتی
ـ ٢٤ میلیۆن و ٣٤٩ هەزار و ٣٥٧ کەس لە دانیشتووانی عێراق و باشووری کوردستان مافی دەنگدانیان هەیە
-دەنگدەران لە نێوخۆی عێراق لە ٨ هەزار و ١٤٨ بنکە دەنگ دەدەن
ـ ١٦٦ بنکەی دەنگدان لە ٧٠ کەمپ لە ٨ پارێزگای عێراق بۆ ئاوارەکان داندراون
-عێراقییەکانی دەرەوەش لە ٢١ وڵات دەنگیان داوە
ـ نزیکەی ٩٠٠ هەزار کەس لە دەرەوە مافی دەنگدانیان هەبووە.
کارناسانی سیاسی لەو باوەڕەدان، کە ئەم هەڵبژاردنەی عێراق لە کاتی ئێستادا بۆ داهاتوو زۆر گرینگه و دەتوانێت ئاسایش و پێکەوەژیان بۆ نەتەوەکانی عێراق دابین بکات.
کورد لە سەر ئەو باوەڕەیە، دەبێ بتوانێت بە هێزێکی نوێیەوە بچێتەوە پارلەمانی عێراق و داوای مافەکانی خۆی بکات، چونکە لە ئێستادا پێگەی کورد لە بەغداددا لاوازه. ئەوەش لە کاتێکدایە ڕێژیمی ئێران بە هەموو شێوەیەک دەستێوەردان لە هەڵبژاردنەکانی عێراقدا دەکات.
