وەزیری ڕێگا و شارسازیی ڕێژیمی ئێران وتوویەتی، تەنیا ٠.٢ لەسەدی کرێچییان لە ئێران بۆ وامی خانووبەرە ناونووسیان کردووە و پارەیان وەرگرتووە.
"محممەد ئیسلامی" وەزیری ڕێگا و شارسازیی ڕێژیمی ئێران وتوویەتی: "تەنیا ٢ ملیۆن و ٣٤٠ هەزار کەس بۆ وەرگرتنی وامی خانووبەرە ناونووسییان کردووە و لەو ئامارەش یەک ملیۆن و ٨٢٠ هەزار کەس بۆ وەرگرتنی وامەکە قەبووڵ کراون و ٤٢٣ هەزار کەسی دیکە لەوانەیە کاری پەروەندەکەیان بۆ تەواو نەکرێت و نەتوانن دەستیان بە پارەی ئەو وامە بگات".
ڕۆژی یەکشەممە ١٦ی خەرمانان، "ئیسلامی" وەزیری ڕێگا و شارسازیی ڕێژیم وتووبووی، لە کۆی گشتیی ئەو کەسانەی بۆ وەرگرتنی وامی خانووبەرە ناونووسییان کردووە هەتا ئێستا ٦٢ هەزار و ١٨ کەس بە بانکەکان ناسێندراون و لەو ڕێژەیەش تەنیا هەزار و ٦١٣ کەس پەروەندەیان تەواو کردووە.
ئەو هەوڵەی ڕێژیمی ئێران لە کاتێکدایە کە کرێ خانوو لە ئێران بەگشتی و لە تاران بەتایبەتی بەنیسبەت ساڵی ڕابردووەوە ٢٧.٤ لەسەد گرانتر بووە و نێونجی گرانیی کرێ خانوو لە هەموو شارەکانی ئێراندا گەیشتووەتە ٣٠.٦ لەسەد.
بەپێی ئاماری ئەو وەزیرەی ڕێژیم، ٩٩.٨ لەسەدی خەڵکی کرێچی لە ئێران ئەو وامەیان پێ نەدراوە و ئەوەش دەگەڕێتەوە بۆ سەختگرتن و ماتڵکردنی خەڵک بۆ ماوەیەکی زۆر لە سەرەی بانک و ئیدارەکاندا.
