"ئیرەج حەریرچی" جێگری گشتیی وەزیری تەندروستیی ڕێژیمی ئێران رایگەیاندووە بە دەست خاڵی ناتوانین دژی نەخۆشیی کۆرۆنا کارێک بکەین و پێویستیمان بە کەرەستە و ئیمکاناتە.
ناوبراو وتوویەتی ماوەی چوار مانگە مووچەی پێرسۆنێلی تەندروستیمان نەداوە ئەوە قەیرانێکی جیددییە.
''ئیرەج حەریرچی'' جێگری وەزیری تەندروستیی ڕێژیم مانگی گەلاوێژ ڕایگەیاندبوو، نزیکەی ٢٥ لەسەد و زیاتر لە یەک لەسەر پێنجی مەرگەکان بەهۆی کۆرۆنایە.
ناوبراو سەرەتای مانگی پووشپەڕ وتبووی بەهۆی نەخۆشیی کۆرۆناوە لە هەر ٣٣ چرکەدا، کەسێک تووشی کۆرۆنا دەبێت و لە هەر ١٣ خولەکدا یەک کەس گیانی لەدەست دەدات.
هەروەها ناوەندی توێژینەوەی مەجلیسی ڕێژیمی ئێران، بە بڵاوکردنەوەی ڕاپۆرتێک ڕایگەیاندبوو کە ئاماری ڕاستەقینەی قوربانییان دوو بەرانبەر و ئاماری تووشبووان لە نێوان ٨ هەتا ١٠ بەرانبەر لە ئاماری وەزارەتی تەندروستیی ڕێژیم زیاترە.
کاربەدەستانی ڕێژیم بۆ پێشگیری و کۆنترۆڵکردنی ئەم نەخۆشییە هیچ هەنگاوێکی جیددیان هەڵنەگرتووە و تەنیا دروشمیان داوە.
