بەبۆنەی ٧٥ـەمین ساڵڕۆژی دامەزرانی حیزبی دێموکراتی کوردستانی ئێران پارتی ئازادیی کوردستان پەیامێکی پیرۆزبایی بۆ حیزبی دێموکرات نارد.
دەقی پەیامەکە بەم چەشنەیە:
بەڕێز: دەزگای پێوەندییە گشتییەکانی حیزبی دێموکراتی کوردستانی ئێران
سڵاوی خەبات و تێکۆشان
خۆشحاڵین لەلایەن مەجلیسی گشتی و کۆمیتەی ناوەندیی پارتی ئازادی کوردستانەوە بەبۆنەی یووبیلی ئەڵماسیی حیزبی دێموکراتی کوردستانی ئێران، پیرۆزبایی گەرم پێشکەشی ڕێبەرایەتی و سەرجەم ڕیزەکانی حدکا و دۆستان و لایەنگرانی بکەین. هەروەها لەم بۆنەیەدا سڵاو دەنێرین بۆ گیانی ڕێبەران و تێکۆشەرانی شەهیدی حیزبی دێموکراتی کوردستانی ئێران کە لە کاروانی خەباتی ٧٥ ساڵەدا، گیانیان بەختی وەدەستهێنانی ماف و ئازادییەکانی کورد و ئامانجەکانی حیزبەکەیان کردووە.
پارتی ئازادی کوردستان PAK هەمیشە سەرەڕای جیاوازییەکان، بەڕێز و بایەخەوە ڕوانیویەتە، خەبات و تێکۆشانی حیزبی دێموکراتی کوردستانی ئێران و پێگەی لە بزاڤی ڕزگاریخوازیی ڕۆژهەڵاتی کوردستاندا و لە هەندێک وێستگە و بڕگەی گرینگ وهەستیاری سێ دەیەی ڕابردوودا لە ڕووبەڕووبوونەوەی هەڕەشەکاندا هاوکار بوون و پشتیان بەیەکەوە بووە.
هەڤاڵانی بەڕێز، ئەم بۆنەیە بە دەرفەت دەزانین کە لە سەر پەرەپێدانی پێوەندییەکانمان و کارکردن لە سەر پێکهێنانی بەرەیەکی یەکگرتووی کوردستانی لەپێناو ئەستاندنی مافی دیاریکردنی چارەنووسی سیاسی خەڵکی ڕۆژهەڵاتی کوردستان و پێکهێنانی دەزگا و دامەزراوەی نیشتمانی و بەهێزکردنی لەشکری نەتەوەیی و نیشتمانی ناحیزبیی ڕۆژهەڵاتی کوردستان پێدابگرین.
لە گەڵ ڕیز و پیرۆزبایی دووبارەدا
پارتی ئازادیی کوردستان PAK
کۆمیتەی پێوەندییە گشتییەکان
١٥ی گەلاوێژی ٢٧٢٠ک
خەلیل نادری
