ناوەندی ژنانی کوردستانی ڕۆژهەڵات بۆ پشتیوانی لە خۆپیشاندانەکانی ئەحواز بەیانییەیەکی بڵاو کردەوە.

دەقی بەیانییەکە بەم چەشنەیە:

ناوەندی ژنانی کوردستانی ڕۆژهەڵات پشتیوانی لە ناڕەزایی خەڵكی خوزستان دەكات

جەماوەری خەڵكی كوردستان...

ژنانی ئازادیخواز...

نەتەوە بندەست‌ و ئازادیخوازەكانی ئێران...

ناوەندە نێودەوڵەتییەكانی مافی مرۆڤ...

ماوەی هەفتەیەكە لە چەندین شار و ناوچەی پارێزگای خوزستان خۆپیشاندان‌ و ناڕەزایی دژی نەبوونی سەرەتاییترین پێداویستیەکانی ژیان وەک ئاو و بەرق دەستی پێكردوە ‌و ڕێژیمی سەرکوتکەری کۆماری ئیسلامی ئەمجارەش سەرەڕای شەق شەقبوونی پەیکەرەی خۆی هەوڵی سەرکوتی ئەو دەنگە مافخوازانەی خەڵکی ناڕازی داوە و تا ئێستا بەپێی هەواڵەکان ڕێژەیەکی زۆر بە  تەقەی ڕاستەوخۆی هێزە ئەمنییەكانی ڕێژیم بەداخەوە گیانیان لەدەست داوە ‌و ژمارەیەكی زۆریش دەستگیر كراون.

ئەگەرچی خۆپیشاندانەكان دژ بە نەبوونی خزمەتگوزاری و نەبوونی ئاو و بەرق دەستی پێكرد، بەڵام لە بەردەوامیی ئەو خۆپیشاندانانە دروشمی خەڵكی ناڕازی تەنیا ڕووخانی كۆماری ئیسلامی ‌و كۆتاییهاتن بەو هەموو نەهامەتییەیە كە لەلایەن دەسەڵاتدارانی ڕێژیمەوە بەسەریاندا سەپاوە.

كۆماری ئیسلامی كە بە درێژایی تەمەنی خۆی هەموو ناڕەزایی ‌و خۆپیشاندانێكی خەڵكی بەشێوەیەكی دڕندانە سەركوت كردووە، ئەمجاریش لە ڕێگەی زەبر ‌و زەنگ‌ و تەقەكردن هەوڵ بۆ بێدەنگكردنی دەنگی ناڕەزایی خەڵک دەدات.

بەرپرسانی ڕێژیم كە هەمیشە ژیان ‌و خزمەتگوزارییەكانی نەتەوەكانی ئێرانیان پشتگوێ خستووە، لە بڕی چارەسەریی كێشەكان ‌و دابینكردنی پێداویستیی سەرەتاییەكان، سەركوتی ناڕەزاییەكان دەكات.

لەئێستادا ناڕەزایەتییەکان گەیشتووەتە شارەکانی کرماشان، ئیسفەهان و بوشێهر و پشتیوانییەکی زۆریش لە خەباتی خەڵکی خوزستان دەبیندرێت و ڕۆڵی بەرچاوی ژنانی خوزستان و چالاکانی ژنی ئێرانیش حاشاهەڵنەگرە و ئەمەش لە ڕەوتی خەباتی ئێستادا گرینگ و چارەنووس سازە.

ناوەندی ژنانی کوردستانی ڕۆژهەڵات، پشتیوانی خۆی لە ئاخێزی خەڵكی ناڕازی پارێزگای خوزستان و سەرجەم داوا ڕەواكانیان دەكات‌ و داوا لە ژنان ‌و پیاوان ‌و سەرجەم نەتەوە بندەستەكانی ئێران‌ و بەتایبەت جەماوەری هۆشیاری خەڵكی كوردستان دەكات پشتیوان ‌و هاودەنگی ئەو ناڕەزاییانە بن ‌و دژ بە سیاسەتە نا ئینسانییەكانی كۆماری ئیسلامی بێدەنگ نەبن.

ناوەندی ژنانی هەروەها داوا لە ناوەندە نێودەوڵەتییەكانی مافی مرۆڤ دەكات بە هانای خەڵكی ستەملێكراوی خوزستانەوە بێن ‌و ناڕەزایی خۆیان دژ بە سەركوت ‌و كوشتاری خۆپیشاندەران لەلایەن هێزە سەركوتکەرەكانی كۆماری ئیسلامییەوە دەرببڕن.

مەرگ‌ و نەمان بۆ دەسەڵاتی ڕەشی كۆماری ئیسلامی

سەركەوێ خەباتی ڕەوای گەلانی ئێران

ناوەندی ژنانی کوردستانی ڕۆژهەڵات

٣١ی پوشپەڕی ١٤٠٠

٢٢ی جولای ٢٠٢١