یه‌كیه‌تیی خوێندكارانی دێموكراتی كوردستان بەبۆنەی ١٢ی بانەمەڕ، ساڵڕۆژی شەهیدبوونی ''سمایل شەریفزادە'' و ڕۆژی خوێندکاری کورد پەیامێکی بڵاو کردەوە.
دەقی پەیامەکە بەم چەشنەیە:
٥٤ ساڵ پێش ئێستا له ڕۆژێكی وه‌ک ئه‌مڕۆدا، شه‌هید ''سمایلی شه‌ریفزاده''، خوێندكاری ده‌روه‌ست و به‌هه‌ڵوێستی كورد و ڕووناکبیری رۆژهه‌ڵاتی كوردستان، کە لەگەڵ چەند پێشمەرگە و هاوڕێی حیزبی لە کاتێکدا لە ناوچەی بانە لە گوندی دارێنەی سەروو، لەلایەن سیخوڕێکی ڕێژیمی شا بەناوی کوێخا شەریف ڕاپۆرت دران و پاشان بەربەرەکانی لەگەڵ ٣٠٠ ژاندرام و ئەمنییەی ڕێژیم لە کۆتاییدا گیانی لە پێناو ڕزگاریی کورد و کوردستان بەخت کرد و دواتر تەرمەکەی لە گۆڕستانی تایلەی شاری سنە بە خاک ئەسپێدرا.
شەهید ''ئیسماعیل شەریفزادە'' کە وەکوو هێما و سێمبۆلی خوێندکاری کورد ناسراوە و ڕۆژی شەهیدبوونەکەشی وەکوو ڕۆژی "خوێندکاری کورد" ناسراوە، لە ئێستاشدا خەبات و تێکۆشانی سەرباشقەی خەباتی پێشکەوتووخوازانەی توێژی خوێندەوار و خوێندکاری کوردە و وانەی خۆڕاگری و ئازایەتی لێ فێر دەبین.
بە ئاوڕدانەوەیەک لە مێژووی ئەو سەردەمە بۆمان دەردەکەوێت، کە له دوای كوده‌تای ٢٨ی گه‌لاوێژی ١٣٣٢ی هه‌تاوی و به نه‌مانی ده‌سه‌ڵاتی دوکتور موسه‌دیق، ئێران و به‌تایبه‌تی ڕۆژهه‌ڵاتی كوردستان به‌ته‌واوه‌تی میلیتاریزه كرابوو، هه‌ر بۆیه گوتاره ڕزگاریخوازانە‌كان كه كپ كرابوون، ده‌بوونه هۆی پێكهێنانی ڕێكخراوی ڕادیكاڵه ڕاستەقینەکان به‌تایبه‌تی له زانكۆی تاران.
ئه‌و سه‌رده‌مه کە هاوكات بوو له‌گه‌ڵ بڵاوبوونه‌وه‌ی هزری چه‌پ له زانكۆكاندا و به‌تایبه‌تی نموونه‌ی به‌رخۆدانی چه‌په‌كانی كوبا و ڤیتنام و هێژموونی یه‌كیه‌تیی سۆڤییه‌ت و حیزبی تووده ببوونە هێمای به‌رخۆدانی نێوده‌وڵه‌تی له هەمبەر داگیركاری و ئێمپریالیزمی پشتیوانیی وڵاتانی دیكتاتۆر .
با لێره‌دا ئه‌وه‌ش باس بكه‌ین، كه سه‌ره‌كیترین هۆكاری دامه‌زرانی زانكۆی تاران له‌لایه‌ن رێژیمی پەهله‌وی، ته‌ڵقین و پاساوهێنانه‌وه بۆ پته‌وكردنی ده‌وڵه‌ت ـ نه‌ته‌وەی ئێرانی فارسی و تواندنه‌وه‌ی باقی نەتەوەکانی دیكه و یه‌كده‌ستكردن و ڕەواییدان بە كولتووری نه‌ته‌وه‌ی زاڵ و سه‌پاندنی به‌سه‌ر باقی نه‌ته‌وه‌كانی ئێراندا بوو، ئەویش له‌ژێر چه‌تری زانکۆ و ڕووناکبیریدا.
ئه‌و پاكتاوسازییە له زانكۆكانی ئێران له‌گه‌ڵ میلیتاریزه‌كردنی شاره‌كان و به‌تایبه‌ت كوردستان هاوكات بوو، کە به هێزی پۆشتە و پەرداختە و پڕچه‌كی سه‌ربازی به شێوه‌یه‌ک كه ڕێژیمی پەهله‌وی خۆی به ژاندارمی ناوچەکە و دوورگەی هێمنی ڕۆژهه‌ڵاتی نێوەڕاست ناودێر كردبوو، بە جۆرێک کە تا ئەو ڕادەیە هیوایه‌ک بۆ گۆڕانكاری و ئازادیی گه‌لانی ئێران نه‌مابوو، ساواک هه‌ر جۆره ده‌نگێكی به‌رهه‌ڵستكاری چەشنی ئێستای ئیتلاعاتی ئێرانی به بیانووی ته‌ناهی نه‌ته‌وه‌یی بێده‌نگ ده‌كرد.
له وه‌ها به‌ستێنێكدا بوو كه شه‌هید ''سمایلی شه‌ریفزاده'' له به‌رامبه‌ر سیاسه‌تی ئاوێته‌كردن و یه‌كده‌ستكردن و به ئامرازكردنی زانكۆ و پێشێلكردنی مافی نه‌ته‌وه‌ییی نه‌ته‌وه‌ی كورد و چینه زه‌حمه‌تكێشەکانی نەتەوەکەی، بوێرانه و بیرمه‌ندانە له داگیركه‌ر ڕاسا و بناغه‌ی سه‌نگه‌ری به‌رخۆدانێكی نوێی له زانكۆی تاراندا به هاوكاریی هاوڕێیەکانی داڕشت و ڕێكخراوی خوێندكارانی نه‌ته‌وه‌ی كوردیان دامه‌زراند و بۆ خۆیشی وه‌ک ئه‌ندامێكی ڕێكخستنه نهێنییەکانی حیزبی دێموكرات له زانكۆ هه‌ر زوو كه‌وته ژێر چاوەدێری و ئازاری سیخوڕانی ساواک .
شەهید سمایل شەریفزادە، كه له سەردەمی كۆماری كوردستان له مه‌هاباد مناڵێکی چاوگەش بوو و بیری منداڵی لەگەڵ بیرەوەرییەکانی کۆمار تێکەڵ ببوو، ڕۆحی شۆڕشگێڕانەی لە ناخدا زیاتر ورووژا و ناچاربوو ڕاسته‌وخۆ له زانكۆوه ڕوو له چیا سه‌ركه‌شه‌كانی كوردستان بكات و به‌رگی پیرۆزی پێشمەرگایەتی لە ڕێبازی كۆماری دێموكراتیكی كوردستان له‌به‌ر بكات و شۆڕشێک نوێژەن بکاتەوە كه له دوای كۆماری كوردستان به خاڵێکی زێڕینی دیکەی شۆڕشی ڕۆژهه‌ڵاتی کوردستان و ئێران داده‌ندرێت، بۆیە به شۆڕشی ساڵه‌كانی ٤٦-٤٧ ناودێر کرا و دەسەڵاتی پووشاڵی و پێترۆدۆلاری ئه‌رته‌شی ئێران و ئمپر‌یالیزم تێک بشكێنێت .
هه‌ر ئه‌و شوێندانه‌رییەی شەریفزادە، وه‌ک خوێندكارێکی كاریزما و ڕێبه‌ری شۆڕش بووە هۆی ئەوەی کە یه‌كیەتیی خوێندكارانی دێموکراتی کوردستان، ١٢ی بانه‌مه‌ڕی وه‌ک ڕۆژی خوێندكاری كورد ناودێر كرد و ڕێره‌وی خوێندكاری كوردی له خوێندكاری ئێرانی جیا كرده‌وه، وه‌ک چۆن هەڵوێستی شه‌ریفزاده ئه‌و ڕاستییه‌ی ده‌رخست كه كێشه‌ی كورد له ئێراندا كێشه‌ی نێوان نه‌ته‌وه‌ی زاڵ و داگیركه‌ر و نه‌ته‌وه‌ی خاک داگیركراوی كورده، نه‌ک شتێكی دیكه .
خوێندكاران و جه‌ماوه‌ری به‌هه‌ڵوێستی ڕۆژهه‌ڵاتی كورستان!
هه‌روه‌ک ئاگادارن ڕێژیمی كۆماری ئیسلامیی ئێران وه‌ک میراتگرێكی دواكه‌وتووی و دیكتاتۆرییه‌تی ڕێژیمی پەهله‌وی، به‌هه‌مان شێوه دژی مافی نه‌ته‌وایەتیی نه‌ته‌وه‌كانی ئێران و خوێندكارانیان له زانكۆكان ده‌جووڵێته‌وه و سیاسه‌تی ئاسمیله‌كردن و ئاوێته‌كردنی ئه‌تنیكی و زمانی و دوورخستنه‌وه و ده‌ركردن و بەندكردنی خوێندكارانی به‌رهه‌ڵستكار و چاوكراوه‌ی گرتووەته به‌ر، به شێوه‌یه‌ک كه سیاسه‌تی بڕوانامەگه‌رایی و دابه‌زاندنی كواڵیتی خوێندن و به ئه‌منییه‌‌تیكردنی كه‌شی خوێندن و هه‌ڵاواردنی ئه‌تنیكی و جێنده‌ری و بڵاوكردنه‌وه‌ی ماده‌ی سڕكه‌ره‌كان، كەڵکاژۆ له بورسیه‌ی خوێندن به مه‌به‌ستی ناردنی مۆرە هه‌واڵگرییەکانی خۆی بۆ وڵاتانی ڕۆژئاوا به مه‌به‌ستی كاری تیرۆریستی و دزینی زانیاری تاقیگەکانی زانكۆوە پێشكه‌وتووەکان، ته‌نیا به‌شێكی بچووكن له دۆخی زانكۆكان و خوێندكارانی ئێران له ئێستەدا.
له چەند ساڵی ڕابردووەوە به هۆی سیاسه‌تی تیرۆریزمی نێوده‌وڵه‌تی كۆماری ئیسلامیی ئێران و ئابڵۆقه‌ی وڵاتانی ڕۆژئاوايی، دۆخی ئابووری وڵاتی ئێران تێک چووه و له لێواری داڕماندایه، ئه‌و دۆخه كاریگه‌ریی له‌سه‌ر كه‌شی خوێندنی باڵا بووه، به‌شێوه‌یەک كه مووچه‌ی مامۆستایانیان بۆ دابین نەکراوە و بۆ قەرەبووی تێچووی خوێندنگه‌كان شه‌هرییه‌ی خوێندكاره‌كانیان له ناكاو چه‌ند قات زیاد كردووه، كه ئه‌م دۆخه جگه له‌وه‌ی دژی یاسای بنچینه‌یی ئێرانه هاوكات بووەته هۆی ئه‌وه‌ی كه به‌شێكی زۆر له خوێندكاران له خوێندن داببڕێن و له به‌رامبه‌ردا مامۆستایان له سه‌رتاسه‌ری ئێران و به‌تایبه‌تی كوردستان ده‌ستیان داوەتە گردبوونه‌وه بە دژی ئه‌و سیاسه‌ته، دیاره لێره شایه‌نی ئاماژه‌پێدانه كه دروشمی مامۆستایانی شاره‌كانی ڕۆژهه‌ڵاتی كوردستان وه‌كوو كرماشان، سنه، مه‌ریوان، سه‌قز، مه‌هاباد و ورمێ ته‌نیا دابینكردنی مووچه نه‌بوو، به‌ڵكوو داواكردنی خوێندن بە زمانی كوردی و ئازادكردنی مامۆستایانی زیندانی به تۆمه‌تی سیاسی و ئه‌منییه‌تی بوو كه ئه‌وه‌ش جێگای سەرنج و تێڕامان و شانازییە.
هه‌ر لێره‌وه سڵاو و پشتیوانی خۆمان بۆ هه‌موو مامۆستایانی كوردستان ده‌رده‌بڕین و پێیان ڕاده‌گه‌یه‌نین كه هه‌ڵوێستان داهاتووی نه‌ته‌وه‌كه‌مان دیاری ده‌كات .
له وه‌ها هه‌لومه‌رجێكدا یه‌كیه‌تیی خوێندكارانی دێموكراتی كوردستان، خوی به داكۆكیكاری مافی خوێندكارانی كورد و مامۆستایان ده‌زانێت و به مه‌به‌ستی وشیاركردنه‌وه و پێشگیری له به‌لاڕێدابردنیان و ڕێکخستنیان به مه‌به‌ستی ڕووخانی ده‌سه‌ڵاتی تاران و دابینكردنی داهاتووی گه‌ش بۆ نه‌وه‌كانمان هەوڵی خۆی وەگەڕ دەخات.
هەر بۆیە له ڕاستای ڕزگاریی کورد و کوردستان، له چه‌ند ساڵی ڕابردوودا به ده‌یان خوێندكاری به‌هه‌ڵوێست و بوێر په‌یوه‌ستی ڕیزه‌كانی شۆرش بوون و له‌وانه‌ش تا ئاستی ڕێبه‌رایه‌تی گەیشتوون و ته‌نانه‌ت چەندین ئەندامی یەکیەتیی خوێندکاران، لە نێو ڕێزەکانی شۆڕشدا شەهید کراون كه پێویستە لێرەدا یادێک لە شەهیدان: ئیبراهیم لوتفوڵڵاهی، ڕه‌سووڵ محه‌ممه‌دزاده، هێمن مه‌ولانژاد، فاروق حه‌سه‌ن‌خه‌یات، سه‌لاح نادری، سامان شێوەسەڵی وسەرجەم خوێندکارە ڕزگاریخوازەکانی کورد بکەین کە لەپێناو ئازادی و دێموکراسیدا گیانی خۆیان بەخت کردووە.
یادو ناویان به‌رز و پیرۆز بێت هزر و ئه‌ندێشه‌یان له یادمان هەمیشە کەسک و قه‌ڵه‌میان له ده‌ستماندایه تا گه‌یشتن به ئامانجه پیرۆزەکانیان .
سەرکەوێت شۆڕشی ڕزگاریخوازیی کورد
سه‌ركه‌وێت خەباتی پێشكه‌وتووخوازی خوێندكاران
نه‌مان بۆ داگیركه‌رانی دواكه‌وتوو
یه‌كیه‌تیی خوێندكارانی دێموكراتی كوردستان
١٢ی بانەمەڕی ٢٧٢٢ی کوردی
