پێشمەرگە گیانلەسەردەستەکانی شار لە بۆکان و تەرەغەی سەربەرزەوە بۆ پشتیوانی لە حیزبە خۆشەویستەکەیان چالاکیی تەبلیغییان بەڕێوە برد و ئامادەیی خۆیان بۆ بەجێگەیاندنی هەر ئەرکێکی حیزبی دەربڕی.
تێکۆشەران و قارەمانانی دێموکرات لەو چالاکییەدا بە نووسینی دروشمی "سەرکەوێ ڕاسان"، "شار پشتیوانی شاخە" و "بژی حیزبی دێموکراتی کوردستانی ئێران"، وەفاداری و ئەمەگناسیی خۆیان بەرامبەر بە ڕێبازی حیزبەکەیان نیشان دا.
ئەو شوێنانەی چالاکیی تەبلیغیی ماندوونەناسانی دێموکرات تێیدا بەڕێوە چووە بریتین لە: "شەهرەک فەرهەنگیان، مزگەوتی تەنعیم و شاخەکانی دەوروبەری شاری بۆکان".
هەروەها دوێنێ پێشمەرگە قارەمانانی شار لە گوندەکانی "پیروەلیی باغی"، "سریلاوا"، "ئاغەڵیان"، "دەوەشاری" و غەوسئاوا"ی سەر بە بۆکان بە بەڕێوەبردنی چالاکیی تەبلیغی، مووشەکباران و تۆپبارانی بنکە و بارەگاکانی حیزبی دێموکراتیان بەتوندی مەحکووم کرد.
لەو چالاکییەدا پێشمەرگەکانی شار ڕایانگەیاندبوو، بە هەموو توانامانەوە پشتیوانی پێشمەرگەکانی شاخ دەکەین و بۆ ڕاماڵینی داگیرکەران شان بە شانی پێشمەرگە گیانلەسەردەستەکانمان چاوەڕێی فەرمانین.
