کوردستان میدیا: پۆلێک لە پێشمەرگەکانی شار لە مەهاباد و ناوچەی شاروێران، بەبۆنەی ٢٦ی سەرماوەز، ڕۆژی پێشمەرگەی کوردستان، لە پەیامێکدا پیرۆزبایی ڕۆژی پێشمەرگەیان کرد.
دەقی پەیامەکە بەم چەشنەیە:
سەرماوەز
سەرماوەز لە هەنیسکی دایک و
بە دڵۆپ دڵۆپی خوێنی شەهید و
لە فەرمێسکی منداڵی هەتیو
لە مێژوویەکی بێکۆتایی فەرچکی گرت
لەسەر پێوەربوونی مرۆڤ، فێری گاگوڵکە بوو
لە شەختە و سەرمای کوێستان
پۆشاکی لەبەر کرد
سەرماوەز لە پەرتووکخانەی پێشەوا
پێنووسی لەدەست کرد
چەکی لەشان کرد و
بە سروودی وا هاتن پێشمەرگە
لەم وەرزەدا، بە ناوی مانگی سەرماوەز
ئەم ڕۆژەی بۆ خۆی دیاری کرد.
وێـــــڕای سڵاوێکی شۆڕشگێڕانە لە چیا بەرزەکانی کوردستان و لە خوێندا شەڵاڵی دایکی کوڕ کوژراو،
تیژترین سڵاو وەک تیژیی خەنجەری بەر پشتێندی پیرە پیاو،
بە تینترین سڵاو وەک تینی لوولەی تفەنگی پێشمەرگە،
بۆن خۆشترین سڵاو وەک بۆنی خۆشی ڕەشە ڕیحانە
و جوانترین سڵاو وەک جــــوانیی کچانی ڕوو سووری کوردستان،
پێشکەشە بە هەموو ئەو خۆنەویستانەی نیشتمان و گیان لەسەر دەستەکانی گەلەکەمان، کە گەورەترین سەرمایەی ژیانی مرۆڤ کە گیانە، حازرن لەو ڕێگایەوە بیبەخشن تا گەلە چەوساوەکەمان لەژێر زوڵم و زۆری حکوومەتی فاشیست و دڕەندەی نائیسلامیی ئێران ڕزگاریی بێت، پیرۆزبایی ئەو ڕۆژە مەزنەیان لێ دەکەین.
ئێمە پێشمەرگەکانی شاری مەهاباد و ناوچەی شاروێران بەڵێن دەدەین بە ڕێبەرایەتیی حیزبی دێموکراتی کوردستانی ئێران و پێشمەرگە قارەمانەکانی شاخ و بنەماڵەی سەربەز و ڕووسووری شەهیدان کە تا ئاخرین دڵۆپی خوێنمان،
ڕێباز و ئامانجی شەهیدان بەرنەدەین و ماندوونەناسانە تا گەیشتن بە ئامانج بەردەوام لە سەنگەری شەرف و خەباتدا بین.
بەرز و پیرۆز بێت ٢٦ی سەرماوەز، ڕۆژی پێشمەرگەی کوردستان
بژی حیزبی دێموکراتی کوردستانی ئێران
بژی ڕاسان، خەباتی شاخ و شار
ڕاسان دژ بە داگیرکەران و جاش و خۆفرۆشان بردەوامە
پێشمەگەکانی شار لە مەهاباد و ناوچەی شاروێران
