پێشمەرگەکانی شار لە مەهاباد بەبۆنەی ٢٦ی سەرماوەز ڕۆژی پێشمەرگەی کوردستان پەیامێکیان بڵاو کردەوە.

دەقی پەیامەکە بەم چەشنەیە:

باوکی شەهیدی ڕێگای وڵاتم

برای شەهیدی جەرگەی خەباتم

دایکی تامەزرۆی دیداری ڕۆڵە

خوشکی خوێنگەرمی سەنگەری تۆڵە

دڵتان ئارام بێ، خوێنتان ون ناکەم

ڕێبازی پاکی باوک و براکەم

ڕێگای پێشەوا و ئاڵا و زمانمە

ڕێگایە ڕزگاریی نیشتمانە

ڕێبازی ئەوان بیر و باوەڕمە

ڕێبازی ئێستا و دواڕۆژی گۆڕمە

ڕێی هەر دوو دونیام هەر ڕێبازیانە

پەیامی ناخم هەست و نیازیانە

تا من بمێنم، بە دڵ و گیانم

پێــــــشمەرگەم بۆ گەڵ، بــــۆ کوردســــــــتانم...

ئێمە پێشمەرگەکانی شار لە مەهاباد بەبۆنەی ڕۆژی ٢٦ی سەرماوەز ڕۆژی پێشمەرگە و ئاڵای کوردستان، پیرۆزبایی خۆمان ئاراستەی بنەماڵەی سەربەرزی شەهیدان، کەمئەندامان، زیندانییانی سیاسیی خۆڕاگر، کادر و پێشمەرگە قارەمانەکانی شاخ و شار، هەموو ئەندامان و بنەماڵەی گەورەی حیزبی دێموکراتی کوردستانی ئێران دەکەین. هەروەها پەیمانی وەفاداری و خۆشەویستیی خۆمان نوێ دەکەینەوە تا سەر درێژەدەری ڕێگا و ڕێبازی شەهیدان بین و سەنگەریان چۆڵ نەکەین.

ئێمە پێشمەرگەکانی شار لە مەهاباد ئامادە و حازری هەر ئەرکێکی حیزبین بۆ زەربەلێدان لە داگیرکەرانی کوردستان و خۆفرۆشان.

بەرز و پیرۆز بێت ڕۆژی پێشمەرگەی کوردستان و ئاڵای کوردستان

بژی حیزبی دێموکراتی کوردستانی ئێران

ڕاسان دژ بە داگیرکەران و چڵکاوخۆران بەردەوامە