کوردستان میدیا: پێشمەرگەکانی نێو شاری مەهاباد و ئەندامان و لاینگرانی حیزبی دێموکراتی کوردستانی ئێران بە بۆنەی جێژنی ٢ی ڕێبەندان بەیاننامەیەکیان بڵاو کردەوە.
مەهاباد، تۆ شاری شێعر و ئاوازی ئەهووراییت
مەهاباد، تۆ لانکەی جەنگاوەرانی خۆرەتاو و هەڵۆوە سوورەکانی دێموکراتی
مەهاباد، ئەی مەکۆی جمان و هەستانەوە و ڕاپەڕین
مەهاباد، تۆ مەندیلەکەی پێشەوا قازی محەممەد و پشتێنەکەی دوکتور قاسملوویت و بزە ئەهووراییەکانی کاک دوکتور سەعیدت لێ دەچۆڕێت.
ئەمڕۆ لە ناخی دڵمانەوە پەیمانی کوردایەتی و دڵسوزی لەگەڵ ڕۆحی بەرزی پێشەوای نەمر قازی محەممەد و بنەماڵەی سەربەرزی شەهیدان و پێشمەرگە قارەمانەکانی سەنگەری شەرەف و زیندانییانی خۆڕاگری سیاسی و کادر و ئەندامان و لایەنگرانی حدکا زیندوو دەکەینەوە، تا وەدیهاتنی ئامانج و ئاوات و خۆزگەی شەهیدان لەسەر ئەو ڕێگا و ڕێباز بین و درێژەدەری ڕێگایان بین هەتا لووتکەی سەرکەوتن نەسرەوین.
لە ناخی دڵمانەوە بە بۆنەی ٧٣هەمین ساڵڕۆژی دامەزرانی کۆماری کوردستان و ڕۆژی دووی ڕێبەندان، لە هەموو کوردێکی بەشەرەف و نیشتمانپەروەر لەم جیهانەدا پیرۆزبایی دەکەین.
مامۆستا هێمن ڕەحمەتی سەبارەت بە مانگی ڕێبەندان دەڵێت:
ڕێبەندان گەرچی ڕێگەبەندانی
گلێنەی چاوی گەلی کوردانی
لە نێو مانگاندا جوان و ڕووسووری
لە تۆدا کرا جێژنی جەمهووری
بژی پێشمەرگەکانی شار و شاخ
ڕاسان بەردەوامە دژ بە تاریکپەرستان و چڵکاوخۆرەکان.
مەرگ و نەمان بۆ حکوومەتی پەت و سێدارە.
پێشمەرگەکانی نێو شار و ئەندامان و لایەنگرانی حیزبی دێموکراتی کوردستانی ئێران
ڕێکەوتی ٢ی ڕێبەندانی ٢٧١٨ی کوردی
ڕاسان بە کاتی مەهاباد
