وەزارەتی پەروەردە و بارهێنانی ڕێژیمی ئێران وتوویەتی، پێنج ملیۆن قوتابی لە ئێران بەهۆی نەبوونی مۆبایل و تەبلێت و بەشداری نەکردنیان لە پۆلە ئانلاینەکان، مەترسیی دواکەوتن لە خوێندنیان لەسەرە.
ڕۆژی سێشەممە ١٤ی گەلاوێژ، "ڕزوان حەکیمزادە" بەرپرسێکی وەزارەتی پەروەردە و بارهێنانی ڕێژیم وتوویەتی: "نزیک بە پێنج ملیۆن قوتابی لە دەسپێڕاگەیشتن بە مۆبایل و تەبلێت بێبەرین و لە خوێندن بەجێ دەمێنن".
زۆرترین ڕێژەی قوتابییە بەجێماوەکان لە خوێندن خەڵکی پارێزگای سیستان و بەلووچستانن.
لە ماوەی ساڵانی دواییدا دەسپێڕاگەیشتن بە ئینترنێت لە ئێراندا گەشەی کردووە، بەڵام هەنووکەش ٢٠ لەسەدی گوندنشینەکان لەو خزمەتگوزارییە بێبەرین.
لە دوای بڵاوبوونەوەی کۆرۆنا لە ئیران، وەزارەتی پەروەردە و بارهێنانی ڕێژیمی ئێران، خوێندنی لە قوتابخانەکانی ئەو وڵاتەدا بە شێوەی ئانلاین و لە ڕێگەی مۆبایل و تەبلێتەوە ڕاگەیاند، بەڵام ئەو کارەی ڕێژیم تەنیا بە زیانی قوتابییانی هەژار و دەستکورت تەواو دەبێت.
