کوردستان میدیا: بەشدارانی دەورەی سیاسیی دەزگای پەروەردە و لێکۆڵینەوەی حیزبی دێموکراتی کوردستانی ئێران، پەیامێکان بە بۆنەی کۆتایی ئەو دەورەوە پێشکەش کرد.
دەقی پەیامەکە:
ئێره سه‌نگه‌ر یای گردن و كردوه‌س
له ڕۆژهه‌ڵات سه‌ربه‌رز، ك له ژیر ده‌سه‌ڵات داگیركه‌ر سه‌ركوت كریه‌ی و ڕۆڵه ئازادیخوازه‌گان ئه‌ڕای بڕین ده‌س داگیركه‌ر و دیاری كردن چاره‌نووس مله‌تیان پا نه‌نه ڕێ موبارزه له سه‌نگه‌ر حزب دموكرات كوردستان ئیران، وه سه‌ربه‌رزیه‌وه سینه ده‌نه وه‌ر و پا ده‌نه گه‌ز و له‌ی سه‌نگه‌ر قورس قایمه ك هویچ زوودرایگ نه‌توینستێه بڕمندێ و هه‌میشه جی گیانفه‌دایی دویه‌ت و كوڕه ئازاگانێ كوردستانه، ئه‌ڕای خزمه‌ت وه نیشتمانیان چالاكی كه‌ن.
له‌و ڕووژه كه شانازی له‌وه‌ر كردنێ دڵنگێ پیروزێ پێشمه‌رگایه‌تی درێه‌یده ڕۆله ئازادیخوازه‌گان له حزب دموكرات، یای گردن و كرده‌وه ده‌س وه پێ كریه‌ی و له‌هزه وه له‌هزه‌ی ژیان پێشمه‌رگایه‌تی فێر بوون و ئه‌زموونه له ڕاسای ته‌جروبه‌یل له‌یه‌وه‌رین و فكر كردن وه بانان.
تاریخ حزب دموكرات كوردستان ئیران وه خاسی نیشانمان ده‌ی ك له‌سه‌ر ڕاسییه‌گان كۆمه‌ڵگا و وه په‌ی نیاز وڵات، پێشه‌نگی موبارزه‌ی دموكراتیكێ مله‌ت كورد له ئیران، له شانی بییه و هه‌میشه به‌رزكردن ئاست زانیاری چ له ڕووی سیاسی چ له ڕووی نزامی خاڵ ئه‌سلی بییه و هه‌میشه له‌ورچه‌و گیریاس.
هه‌ر ئنسانیگ له‌هه‌ر مله‌تیگ، له وه‌رایوه‌رێ وڵاته‌گه‌ی وه‌زیفه و ماف خه‌وی درێد و ئی ڕاسییه له دونیای ئمڕووژ دیاری كه‌ی ك هه‌ر كه‌سێك بایس ئه‌ڕای خزمه‌ت كردن فره‌تر، وه‌گه‌رد زانیارییه‌گان ڕووژ ئاشنایی داشتوود و وگه‌رد ئیسكه‌ی جه‌هان خوه‌ی ڕیك بخه‌ی.، كه نه‌ته‌نیا ژیان تاكه كه‌سی خوه‌ی بتوێنێ وه‌ڕیه‌و بووه‌ید، به‌ڵكه بتوێنێد كۆمه‌لگاگه‌ی خوه‌ی وه‌ره‌و نوا بوه‌یدن.
ئی بابه‌ته له حزب دموكرات هه‌میشه له‌ورچه‌و گیریاس ، ك پێشمه‌رگه‌یل ئی حزبه له یه‌كه‌م ڕووژ ژیان پێشمه‌رگایه‌تیان له فه‌زاییگ قه‌رار گرن ك هانده‌ریانه ئه‌ڕای به‌رزكردن زانیاری و وه وه‌زیفه‌ی خوه‌یان زانن كه بكه‌فنه شوێن وه ده‌س هاوردن زانیارییه‌گان، ك بتوێنن بیلنه‌ی ئختیار كۆمه‌ڵگایان ئه‌ڕای سه‌ركه‌فتنێ وڵاتیان.
هه‌ر له‌ی ڕاساییشه حزب دموكرات كوردستان ئیران، به‌رنامه‌ی ئه‌سلی و گرنگی ئه‌وه بییه ك په‌روه‌ده جوور بنه‌وای سه‌ركه‌فتن بییه ئه‌ڕای و ته‌ك وه ته‌ك ئیمه كه له‌ی ڕێه قه‌ده‌م هه‌ڵگریمن، له په‌ورده‌ی ئی حزبه، جوور دانشگایگ هه‌ر ڕووژ ده‌روه‌چ تازه‌ییگ وه ڕووی دونیا ئه‌ڕامان كردنه‌سه‌و، ك بتوێنیمن له ڕاسای داخوازییه‌گانی خه‌ڵق خوه‌مان بچیمنه پیش و بنچینه‌ی كۆمه‌ڵگای مودرنیگ بنیمن و گۆڕیان له كۆمه‌لگا دروس بكه‌یمن.
له‌سه‌ر بنه‌وای په‌روه‌رده‌یی حزب دموكرات و دیدگای گۆڕیان له كۆمه‌ڵگا، پله وه پله ده‌روره‌یلێ تایبه‌ت وه‌ڕێه‌و چوود و له هه‌ر ده‌وره‌یگ باس تازه‌یه‌گ ئه‌ڕامان شیه‌و كریاس و زانیاری نوو دریه‌یده پێمان ، ك وڵاتیگ بونیاد بنه‌یمن له‌سه‌ر مافه ئنسانییه‌گان و هه‌ر تاكیگ له‌وپه‌ڕی ئازدییه‌گانی، خزمه‌ت وه نیشتمان وه وه‌زیفه‌ی خوه‌ی بزانێد و كرده‌وه داشتوود.
ئیسكه‌یش كه حزب دموكرات كوردستان ئیران، شیوه‌ی تازه‌ییگ له موبارزه گردیه‌سه وه‌ر، وه ناوێ ڕاسان و شاخ و شار گره داسه یه‌ك، نوو بوون و دیدگای تازه و زانیاری سه‌رده‌میانه، وه تایبه‌تی تر ده‌سنیشان كریاس ، ك هه‌ر پێشمه‌رگه‌یگ له ڕووی زانیاری سیاسی ونزامی له ئاستیگ بوود ك بتوبێد جواوده‌رێ داخوازییه‌گان خه‌ڵق وڵاته‌گه‌ی بوود و جوور پیشره‌ویگ له موبارزه جه‌هه‌ت بیه‌یدن وه كۆمه‌لگاگه‌ی.
له حزب دموكرات، ده‌وره‌گان و ده‌رسه‌گان به‌ن نه‌كریاس وه چه‌ن باس، به‌لكوو هه‌ر جارییگ كه پێشمه‌رگه به‌شداری كه‌یدن له ده‌وره‌گان ته‌مام ئه‌و زانیارییه‌لیگ له ژیان ئنسانه‌گان لازم و ئه‌ڕای موبارزه پێویسته له اختاری نتیه‌یدن،
له بوار سیاسی، بنه‌وای سیاسه‌ت كردن و دیدگاه تازه‌گان سیاسه‌ت و زانییارییه‌گانی، وه شیوه‌ی وه ڕووژ و مودرن باس كریه‌یاس و كریه‌ی،
له بوار نزامی، له ده‌وره‌گان، یای گردیمنه كه وه چ شیوه‌ییگ له گشتێ ڕێ ڕه‌واگانێ موبارزه‌ی ڕه‌وا، ئه‌ڕای دفای و پاراستن مله‌ته‌گه‌مان ، ئستفاده بكه‌ینم.
له‌ی ده‌وره‌ی سیاسی تازه‌ی ده‌زگای په‌روه‌رده‌ی حزب دموكرات كوردستان ئیران ك وه شانازییه‌وه به‌شداریی كردیمنه، ته‌ك وه ته‌كمان شیوه‌ی نووڕستنمان و پرسه سیاسییه‌گان و داخوازی مله‌ته‌گه‌مان تازه‌و بییه و ڕیكاره‌گان و لازمه‌یل سه‌ركه‌فتن وه خاسی ئه‌ڕامان شییه‌و كریاس كه بتوێنیمن وه‌گه‌رد خه‌ڵق خوه‌مان له ڕووژهه‌ڵات باسیان بكه‌یمن و ده‌س بیه‌یمنه ده‌سه یه‌كتر، له‌ی ڕییه كه هزاران ڕۆڵه‌ی ئازا، گیانیان فه‌دای وڵاتیان كردنه، وه دریژه دانی و له‌سه‌ر ئراده‌ی به‌رز مله‌ته‌گه‌مان، مزگانی ڕزگاری بییه‌یمنه شه‌هیده‌گان و ئازادی جوور خه‌ڵات بییه‌منه نه‌سڵێ بانانێ نیشتمان.
ئیمه به‌شداره‌یل ئی ده‌وره، كه له ده‌زگای په‌روه‌رده‌ی حزب دموكرات كوردستان ئیران وه ڕیه‌و چی، وه تایبه‌تی ده‌سخوه‌شی كه‌یمن، له ده‌زگای په‌رورده و ته‌ك وه ته‌ك ماموستاگان ك شه‌كه‌تی نه‌ناسانه، له په‌روه‌رده كردن ئیمه زه‌حمه‌ت كیشان.
١٥ ی ڕه‌شه‌مه‌ی ١٣٩٧ی خوه‌ری
