دەزگای پێوەندییە گشتییەکانی حیزبی دێموکراتی کوردستانی ئێران بەبۆنەی کۆچی دوایی دوکتور "فرسەت سۆفی" پەیامی هاوخەمیی بۆ سەرۆکایەتیی ئەنجومەنی وەزیرانی حکوومەتی هەرێمی کوردستان نارد.
دەقی پەیامەکە بەم چەشنەیە:
بەڕێز سەرۆکایەتیی ئەنجومەنی وەزیرانی حکوومەتی هەرێمی کوردستان
لەگەڵ سڵاو و ڕێزمان
بە داخ و کەسەرێکی زۆرەوە هەواڵی کۆچی دوایی کاک دوکتور "فرسەت سۆفی عەلی"، پارێزگاری هەولێرمان بەهۆی نەخۆشییەوە پێ گەیشت و بوو بەهۆی خەم و پەژارەی هەموو لایەکمان.
بەبۆنەی ئەم هەواڵە ناخۆشەوە سەرەخۆشی لە بەڕێزتان و سەرکردایەتیی پارتی دێموکراتی کوردستان و ئەنجومەنی پارێزگای هەولێر و بنەماڵەی نیشتمانپەروەری ئەم ڕۆڵە دڵسۆزەی گەلەکەمان دەکەین.
کاک فرسەت سۆفی، کەسایەتییەکی ئاکادێمی و سیاسی بوو و لە ماوەی کار و تێکۆشان و خزمەت بە ئامانجەکانی گەلی کورد لە بواری زانستی، یەکێک لە مامۆستا پلەبەرزەکانی کوردستان بوو و هاوکات لە بواری یاسادانان و بەشداری لە پرۆسەی حوکمڕانیی هەرێمی کوردستانیشدا یەکێک لە سیما ناسراو و بەتواناکانی پارلمانی هەرێمی کوردستان بوو و لە دوایین ئەرکی ئیداری و خزمەتگوزاریشدا یەکێک لە کەسایەتییە خەمخۆرەکانی گەلەکەمان بوو.
کۆچی دوایی ئەم ڕۆڵە بەتوانا و بە بڕشتەی گەلەکەمان بۆ پارتی دێموکراتی کوردستان و پرۆسەی سیاسیی هەرێمی کوردستان، خەسارێکی گەورە بوو.
حیزبی دێموکراتی کوردستانی ئێران جارێکی دیکە لەگەڵ بنەماڵەی بەڕێزیان و هەموو دۆستان و هەڤاڵانی حیزبی و حکوومیی هاودەردی و سەرەخۆشی دەکات.
سڵاو لە گیانی پاکی فرسەت سۆفی عەلی
حیزبی دێموکراتی کوردستانی ئێران
دەزگای پێوەندییە گشتییەکان
محەممەدنەزیف قادری
٢٨ی خەزەڵوەری ١٣٩٩ی هەتاوی
١٨ی نۆڤامبری ٢٠٢٠ی زایینی
