کوردستان میدیا: ئەندامان و لایەنگرانی حیزب لە شاری سەقز بۆ جارێکی دیکە وێڕای دەربڕینی پەیامی هاوخەمی لەگەڵ حیزب و بنەماڵەی سەربەرزی شەهیدان پەیمانی وەفادارییان لەگەڵ ڕێگا و ڕێبازی شەهیدان و حیزبی دێموکرات نوێ کردەوە.
دەقی پەیامەکەیان بەم چەشنەیە:
وێڕای دەربڕینی پرسە و سەرەخۆشی خۆمان لە حیزبی خۆشەویستی گەل و بنەماڵەی سەربەرزی شەهیدان، هیوادارین برینی زامدارانی ڕووداوەکەی ١٧ی خەرمانان بە زووترین کات ساڕێژ ببێتەوە.
کۆماری ئیسلامی بەپێی هەقێقەتی جەوهەری خۆی دەس لە هیچ چەشنە جینایەتێک دەرحەق بە گەلی کورد و بزووتنەوە ڕەواکەی هەڵناگرێت و مووشەکباران کردنی کەمپ و بنکە و بارەگاکانی حیزب لە کۆیەش دەچێتە هەمان چوارچێوە، بەڵام لەگەڵ ئەوەشدا ئەم جۆرە کردەوانەی ڕێژیمی پەت و سێدارە نیشانەی دۆشداماوی و ترسی ئەوان لە ڕووخان و کۆتایی هاتنی تەمەنی نگریسییانە.
ڕێژیمی تاران لە هەموو بوارەکانی ئابووری، سیاسی، کۆمەلایەتی لەگەڵ شکست و قەیرانی متمانە بەرەوڕوو بووە و دەیهەوێ بەم چەشنە کردەوە قێزەونانە خۆی لە ڕاستییەکانی کۆمەڵگا بشارێتەوە.
ئێمە ئەندامان و لایەنگرانی حیزب لە شاری سەقز وێڕای دەربڕینی دووبارەی هاوخەمی خۆمان لەگەڵ کادر و پێشمەرگە و رێبەرایەتی حیزب بەڵێن دەدەین کە تاسەر وەفادار بین بە ڕێبازی شەهیدان و کۆڵ نەدەین.
سەرکەوێ بزووتنەوەی ئازادیخوازانەی گەل
مەرگ و نەمان بۆ ڕێژیمی کۆنەپەرست
بژی پێشمەرگە
بژی ڕاسان
