یەکیەتییەکانی خوێندکارانی دێموکراتی کوردستان، ژنان و لاوانی دێموکراتی کوردستانی ئێران بەبۆنەی ۱۰ی خاکەلێوە، ڕۆژی شەهیدانی کوردستان پەیامێکیان بڵاوکردەوە.
دەقی پەیامە بەم چەشنەیە:
بنەماڵەی سەربەرزی شەهیدان!
خەڵکی خۆشەویست و بەئەمەگی کوردستان!
زیندانییانی سیاسیی کورد و ڕزگاریخوازانی کوردستان!
هەر وەک دەزانن لە ١٠ی خاکەلێوەی ۷٥ ساڵ پێش یەکەم سەرکۆماری کوردستان پێشەوا ''قازی محەممەد '' و هاوڕێیانی ''سەیفی قازی و سەدری قازی''، لە مەیدانی چوارچرای مەهاباد، لەلایەن بەناو دادگای حکوومەتی پەهلەوییەوە لە سێدارە دران و گیانی ئازیزیان بە خاکی پاکی کوردستان سپارد، بۆیە ئەم ڕۆژە کە لە بیرەوەری کورددا وەکوو بیرەوەرییەکی تاڵ و ناخۆش سەیر دەکرێت، لە ئێستەدا کراوەتە هێمایەک بۆ یادکردنەوە شەهیدانی کوردستان و پەیمان نوێکردنەوە لەگەڵ ڕێبازەکەیان.
ئەم کۆمارە کە خولیا و ئاواتی نەتەوەی ستەملێکراوی کوردە، یەکەم دەسکەوت و سیستمی دێموکراتیک و مودێڕنی کورد لە ناوچەی ڕۆژهەڵاتی ناوین بوو، پاش یازدە مانگ و چەند ڕۆژ لە دامەزرانی، بە هۆی پیلانە دەرەکی، ناوچەیی و نێوخۆیییەکانەوە، کەوتە بەر هێرشی بێبەزەییانەی ئەرتەشی حکوومەتی محەممەدڕەزای شای پالەوی و جوانەمەرگ کرا.
بەڕێزان جێی ئاماژەیە کە ۷٥ ساڵ پێش پێشەوای نەمر بیری لە مافی ژنان، لاوان و تەنانەت توێژی خوێندەواری کوردستان و سەرجەم چین و توێژەکانی کۆمەڵگای کوردەواری کردبووەوە و بە کردەوەش لەو کۆمارە کەمتەمەنەدا خستیە بواری جێبەجێکردنەوە و خاڵێکی جێی سەرنجیش ئەوەیە کە هاوکات لەگەڵ دامەزراندنی کۆماری دێموکراتیکی کوردستان، لە ناوەندی ئورووپا کە خۆیان بە لانکەی دێموکراسی ناو دەبەن، هیتلەری نازیسم کوورەی مرۆڤ سووتاندنی دامەزراندبوو.
تیکۆشەرانی ڕێگای ئازادی و سەربەستی!
پێشەوا قازی محەممەدی نەمر لەو سەردەمەدا باسی لە ئازادی و مافەکانی ئینسانیی نەتەوەی کوردی دەکرد و لە بەرانبەردا سیاسەتی ڕێژیمی پاشایەتی دژ بەم نەتەوەیە زۆر نامرۆڤانە بوو و دوای ئەو ڕێژیمە دڕندەیە ڕێژیمێکی دیکتاتۆر و مرۆڤکوژتر هاتووەتە سەرکار و تا ئەمڕۆ، ئەگەرچی باس لە بەرجامێکی دیکە دەکرێت، لە جنایەتەکانی دژ بە نەتەوەی کورد و هەموو نەتەوەکانی ئێران دەستی نەپاراستووە و هەر بۆیە جارێکی دیکە، ئێمه وەکوو ڕێبوارانی ڕێگای شەهیدان، لەگەڵ گیانی پاکی شەهیدی ڕێبەر پێشەوا قازی محەممەد و هەموو شەهیدانی کوردستان پەیمان نوێ دەکەینەوە کە تاسەر بە ڕێبازی پیرۆزیان وەفادار دەمێنینەوە.
لە کۆتاییدا سڵاو دەنێرین بۆ گیانی پاکی هەموو شەهیدانی کوردستان.
بڕووخێت کۆماری پەت و سێدارە.
یەکیەتییەکانی خوێندکارانی دێموکراتی کوردستان، ژنان و لاوانی دێموکراتی کوردستانی ئێران
۱۰ی خاکەلێوەی ۲۷۲۲ی کوردی
