کوردستان میدیا: یەکیەتیی زانایانی ئایینیی کوردستانی ئێران، لە دووتوێی پەیامێکدا، پیرۆزبایی جێژنی پیرۆزی ڕەمەزانیان لە موسڵمانان، بنەماڵەی سەربەرزی شەهیدان و زیندانیانی سیاسی و کادر و پێشمەرگەکانی کوردستان کرد.
دەقی پەیامەکە بەم چەشنەیە:
بە ناوی خوداوەندی دلۆڤان.
بە بۆنەی جێژنی مانگی پیرۆزی ڕەمەزان، پیرۆزبایی لە سەرجەم باوەڕدارانی موسوڵمان، هەر چوارپارچەی کوردستان، بنەماڵەی سەربەرزی شەهیدان، زیندانیانی سیاسی خۆڕاگر و هەروەها کادر و پێشمەرگەکانی کوردستان دەکەین، هیوادارین ئەم جێژنە، جێژنی خۆشی و شادیی هەموو لایەک بێت و ئاشتی و ئازادی لە ژێردەستیی داگیرکەرانی کوردستان، بەدی بێت.
وەک یەکیەتیی زانایانی ئایینی کوردستانی ئێران، داوا لە هەموو لایەک دەکەین، بە بۆنەی ئەم جێژنە ئایینییەوە، سەردانی گۆڕی شەهیدان و بنەماڵەی ڕێزداریان و زیندانیانی سیاسی بکەن و سەخاوەت بنوێنن و دڵشادیان بکەن، کە بێگومان، بێبەش نابن لە ئەجر و پاداشی خوداوەندی بەخشەندە. جێژنتان پیرۆز و ژیانتان شاد و سڵامەت بێت.
یەکیەتیی زانایانی ئایینیی کوردستانی ئێران
١٢ی جۆزەردانی ١٣٩٨ی هەتاوی
