کوردستان میدیا: ئەندامانی نهێنی حیزبی دێموکراتی کوردستانی ئێران له کرماشان، له دووتوێ پەیامێکدا به بۆنەی گیان لەدەستدانی شەریف باجوەر، خۆیان به درێژەدەری ڕێگای شەهیدانی ئازادیی گەل و نیشتمان ناو برد.

دەقی پەیامەکە بەم چەشنەیە:

وە ناو بەرز کورد و کوردستان

وە داخ و پەژارەی فرەیگ خەوەر گیان لە دەس داین کاک شەریف باجوەر و سێ هاوڕی ژینگە پارێز کاک ئومید کۆنەپۆشی، ڕەحمەت حەکیمی‌نیا و موحەممەد پەژووهی وە پێمان ڕەسی.

ساڵەیل ساڵە ک کۆمار سێدارەی ئسڵامی و سپای ترۆریستی پاسداران، ئەڕای نابوود کردن کوردستان، نەتەنیا لە وڵاتمان دەس دانەسە گردن و کوشتن و وە سێدارە داین مەردوم عادی و جوانەیل وڵاتمان، وە شێوەی وەحشیانەیش سرۆشت و تەبیعەت کوردستانیش کردنەسە ئامانج ئاگر کین و دوشمەنی خوەیان و ڕووژ نییە ک خەوەر گیریان و کوشتن و بڕین جوانەیل و چاڵاکەیل شار و ئاگر داین دارستانەیل و سرۆشت وڵاتمان نەژنەفیمن و وەی بوونەوە فرە لە چاڵاکەیل مەدەنی، سیاسی، خوێندکاری و... هەر کام وە شێوەیگ ک ئەڕایان کریەیدن لە وەرانوەر پیلانەیل حوکوومەتە‌و وسانە و دژکردەوە و ناڕزایەتی خوەیان نیشان دانە.

کاک شەریف باجوەر، یەکیگ لەو چاڵاکەیل مەدەنی و ژینگەپارێز کوردستان بی ک لە دریژایی ساڵەیل خەباتی ئەڕای بەرگری لە ژینگە و سرۆشت کوردستان و هەیجوورەیش ماف زندانییەیل سیاسی و کولبەرەیل و تەنانەت لە وەخت زەوی‌لەرزەگەی کرماشانیش ئەڕای کوومەک و یارمەتی ڕەسانن وە مەردم کرماشان وە گشت هاز و توان خوەی تەقەلا کرد. وە شوون دەس وە پێ کردن قۆناخ تازەی خەبات حزب دێموکرات ک وە ڕاسان ناسریاس، کاک شەریف جوور پێشمەرگەیگ شار و ئەندامێگ شەکەتی نەناس و دڵسووز حزب دمۆکرات کوردستان ئێران خەبات و تێکووشانێ ئەڕای ڕەسین وە ئازادی و سەربەرزی کوردستان وە گوڕتروە بی و تا ئاخرین هەناسەی ژیانێ دەس لە خەبات لە ڕێ وڵاتێ هەڵ نەگرد و لە ئاخریشەو جوور باقی هاوڕێیەیل پێشمەرگه‌ی شاخ ک لە شەڕەیل قەرەسەقەڵ، کۆساڵان، کێلەشین و... گیانێیان بەخت بانان پڕ لە شانازی وڵاتمان کردن، ئەویش وە پێشکەش کردن گیان پاکی، بییە سەمبوڵ یەک گردن خەبات شاخ و شار.

وەی بوونەوە، ئیمە بەشێگ لە چاڵاکەیل دانشجوویی زانکۆی ڕازی، چاڵاکەیل مەدەنی و ئەندامەیل تەشکیلات نهێنی حزب دێموکرات کوردستان ئێران لە شار کرماشان، پەیام هاوخەمی خوەمان ئاراستەی بنەماڵەی سەربەرز شەهیدان کاک شەریف باجوەر و باقی شەهیدەیل ڕاسان شاخ و شار و مەردوم مەریوان کەیمن و جارێگتر پەیمان خوەمان وەگەرد حزب دمۆکرات کوردستان ئێران و هاوڕێیەیل شەهیدمان و ڕێباز پڕ لە شانازیان دوارەوە کەیمن و بەڵێن دەیمە پێیان ک تا ئاخرین قەترەی خۊنمان دریژەدەر ڕێیان بیمن.

 شەهید نامرێ

بژی ڕاسان

 بژی حزب دێموکرات کوردستان ئێران

 ئەندامەیل تەشکیلات نهێنی حزب دێموکرات کوردستان- زانکۆی رازی کرماشان