یەکیەتیی خوێندکاران بۆ بە یارمەتیدان به ژینگەپارێزان ڕاگەیاندراوێکی بڵاو کردەوە.
دەقی ڕاگەیاندراوەکە بەم چەشنەیە:
بانگەواز بۆ یارمەتیدانی ژینگەپارێزان
هاونیشتمانییانی بەهەڵوێست و خۆڕاگر
هەر وەک ئاگادارن، نەیاران و دوژمنانی کورد و ژیانکوژ، دەست لە هیچ کارەساتێک ناپارێزن و ئیرادەیان بۆ کاولکردن و خاپوورکردنی ژینگە بەستووە و لە ڕۆژانی ڕابردوودا بینەری سووتانی دارستانەکان و هەڵقرچانی ئاژەڵە بەستەزمانەکانین کە بێ بەزەیانە لەنێو تینی ئاوردا لە نێو دەچن. ئەو کەسانەی بە دەستی خۆیان ئاور لە شاخ و کێوی کوردستان بەردەدەن خەیانەت بە کورد و کوردستان دەکەن.
بێگۆمان دەستی کۆماری پەت و سێدارە و ژیانکوژی ئیسلامیی ئێران لەنێو ئەم کاولکارییانەدا دیارە، ئەوکەسانەی کە بە هەر شێوازێک بەشداری خوڵقاندنی ئەم کارەساتە دەبن، دەبێت لقاو و سزا بدرێن.
کاتێک ئۆرگانە حکوومەتییەکان و ناحەزانی ژینگە بە شێوازی سیستماتیک و پلانداڕێژراو جینایەت دژی مرۆڤایەتی و دارستانەکان دەخوڵقێنن دەبێت خۆمان قۆڵی هەڵمەت هەڵماڵین و بۆ پاراستنی ژینگە نابێت چاوەڕێی دەزگا حکوومەتییەکان بین کە پێش بە سووتانی دار و ئاژەڵە بەستەزمانەکان بگرین.
خەڵکی نیشتمانپەروەری کوردستان
با هەر هەموومان پێکەوە یارمەتیدەری ژینگەپارێزان بین و لە پاراستنی ژینگە تەنیا و بێ یار نەمێنن، با ئیزن نەدەین دۆژمنانمان بە ئاسوودەیی بتوانن ژینگە، دارستان و لەوەڕگەکانمان لە نێو ببەن، نەتەوەدۆستی لە سۆز و وەفا بۆ ژینگەی نیشتمان سەرچاوە دەگرێت کە ئێمەی لە ئامێزی خۆیدا پەروەراندووە.
ئەوڕۆ ئەرکی سەرشانی ئێمەیە پارێزگاری لە دارستان، ئاژەڵان و ژینگەی کوردستان بکەین.
وەکوو یەکیەتیی خوێندکارانی دێموکراتی کوردستان، داوا لە سەرجەم خەڵکی نیشتمانپەروەر و پێشمەرگەدۆستی کوردستان، ڕەشماڵ و هەوارنشینان، ئاژەڵداران، گوندنشینان، خەڵکی سەرجەم شارەکانی کوردستان دەکەین، کە یارمەتیدەری ژینگەپارێزان بن و بەپێی توانایان بە هانای ژینگەی کوردستان و ژینگەپارێزانەوە بڕۆن، چونکە بەدەستی بەتاڵەوە شەڕی ئاور دەکەن، با هەموان ڕوو لە شاخ و کێوەکان بکەن بە هێزی مرۆیی و مادیی خۆمان یارمەتیدەر بین بۆ پێشگرتن لە سووتانی خاک و زێدەکەمان، نەمانی ژینگە داهاتووی هەموومان دەخاتە مەترسییەوە و مەبەستی ناحەزانی ژینگە ئەوەیە کە ژیانمان بسووتێنن و داهاتوومان لە نێو ببەن.
بەڵێ بۆ ژینگەی سەوزی نیشتمان!
بەلێ بۆ بەهاناچوونی ژینگەپارێزانەوە!
یەکیەتیی خوێندکارانی دێموکراتی کوردستان
۱٦ی پووشپەڕی ۲۷۲۱ی کوردی
