یەکیەتیی خوێندکارانی دێموکراتی کوردستان لەسەر دەست بەکار بوونەوەی گۆڤاری "بیری خوێندکار" ڕاگەیەندراوێکی بڵاو کردەوە.
دەقی ڕاگەیەندراوەکە بەم چەشنەیە:
هاووڵاتییانی بەڕێز!
قەڵەمبەدەستانی هۆگری ڕزگاری و بەختیاریی کوردستان!
یەکیەتیی خوێندکارانی دێموکراتی کوردستان، کە پێشتر خاوەن گۆڤارێک بە ناوی "بیری خوێندکار" بوو، بەداخەوە ماوەی چەند ساڵێک بە هۆی کێشە و گرفتی تایبەتەوە ڕەوتی چاپ و بڵاوکردنەوەی ئەم گۆڤارەی ڕاگیرابوو، بەڵام بە هۆی گرنگیی ڕۆڵی خوێندکار لە بزووتنەوەی ڕزگاریخوازیی کورد لە ئێستە و داهاتوودا، پاش کۆنگرەی شەشەم و لە کۆبوونەوەیەکی بەڕێوەبەرانی یەکیەتیی خوێندکاران بڕیار درا چاپ و بڵاوکردنەوەی گۆڤاری "بیری خوێندکار" بە شێوەی وەرزنامە سەرلەنوێ دەست پێ بکاتەوە.
هەر بەم بۆنەوە داوا لە دڵسۆزان و قەڵەمبەدەستانی ڕزگاریخوازی کورد دەکەین، لەم پێوەندییەدا یارمەتیدەر و هاوکارمان بن.
مژاری سەرەکیی ئەم ژمارەیە، "ناسیۆنالیزم و گلۆبالیزمی هاوچەرخـ"ـە و ئەم بابەتانەی خوارەوە لە بازنەی ئەم مژارە سەرەکییەدان و نێوەڕۆکەکانی لە خۆ دەگرن.
١ـ ناسیۆنالیزمی خۆسەپێن و ناسیۆنالیزمی بەرگریکارانە
۲ـ گلۆبالیزمی کۆمۆنیستی و بزاڤی ڕزگاریخوازیی کورد
۳ـ گلۆبالیزمی ئایینی (ئۆمەت تەوەر) و بزاڤی ڕزگاریخوازیی کورد
٤ـ ستراتیژیی کورد بۆ ڕزگاریی خاک
٥ـ گلۆبالیزمی سەوز و ژینگەپارێزیی کورد
تێبینی ١: جیا لەو بابەتانەی کە دەسنیشان کراون، بابەتی دیکە بە مەرجی پەسەندکردنی لەلایەن لێژنەی ئامادەکاریی گۆڤارەوە چاپ دەکرێت.
تێبینیی٢: بابەتەکان نابێت لە ١٥٠٠ وشە کەمتر بێت و لە ٣٠٠٠ وشە زیاتر بێت.
تێبینیی٣: دوامۆڵەتی ناردنی بابەتەکان ٢٠ی بانەمەڕی ٢٧٢١ی کوردییە.
تێبینیی٤: بابەتەکان بۆ ئەم ناونیشانە ([email protected]) بنێردرێت.
