دیار
ڕێژیم جومهوری ئسلامی لە دەسوەپێکردنێ دەسەڵاتی وە شوعارەیل ئیدئولوژیک هەوڵ دیاد تا جی خوەی قورس و قایم بکەید و پاڵپشی خەڵق وە دەس بارێد.
ئی شێوە لە سیاسەت شوعاری تا ئێرنگەیش بەردەوامە و لە ڕاسی ڕێژیم تەنیا وە شوعارە ک بوونیگ درێد و ئەڕای مەردومان ئێرانیش وە خاسی دەرکەفتە ک لە پشت شوعارەگانیان چ سیاسەتییگ هەس و لە لای تریش خاس زانیمن ک هوێچ کردەوەییگ لە شوون شوعارەگان نییە.
لە دەسوەپێکردنێ شەڕێ ڕێژیم جومهوری ئسلامی و ڕێژیم بەعس لە عەراق،ڕێژیم دەسکرد وە شوعاردان و دروسکردنێ سرودەیل ئیدئولوژیک و وەی ڕێە فرەییگ لە مەردوم دادە کوشت و خەسار فرەییگ دادە نەتەوەگان وە تایبەت کورد و عەرب ک لەی ناوە لەبەین شەڕەگان بین و مەرزی بوێنیان بییە بایس خەسارەیلییگ ک ئیسکەیش چارەسەر نەیونە.
یەکیگ لە شوعارەیل ئەو سەردەمە ئەوە بی ک وەتیان"راه قودس از کربلا میگذرد"
باس سەرەکی ئێمە لەسەر ئی شوعارەسە ک هەشت ساڵ ڕێژیم شەڕ دریژە دا و تواستیا کربلا بگرید و بچوود ئەڕای قودس و دەسەڵات ناڕەوایان بخەنە سەر وڵاتەیل ترک و ئسرائیل لەبەین بووەن.
لەو هەشت ساڵ شەڕە نەتەنیا نەتوێنستن کەربەلا بگرن بەڵکە بەشییگ لە خاک ئێرانیش لە کیسدان و لە ئاخریش ک شەڕەگە کیشریا وەرەو دەسەڵات خوەیان و تاران بییە ئامانج خومەینی جام زەهر خوارد و شەڕ گیردان.
لەی ناوە بایس باس لەوە بکەیمن ک ئەگەر ئی شەڕە نەک هەشت ساڵ بگرە هەشتا ساڵیش دریژە بکیشیاد و هەر لە کوردستان و ئەحواز بیاد هوێچ سوڵحییگ نیەکردیان، چوونکە نەتەوەگان و گیان خەڵق کوردستان و ئەحواز ئەڕای ڕێژیم ئەهەمیەتییگ نەیرێد.
ئێرنگە ک سالیانییگە شەڕ وە ئاخر ڕەسییە، ڕێژیم کەمتر ئەو شوعارە وەکار تیەرێ و چمانی ڕێ وەلێ گوم بییە و نیەزانن چیو وەرەو قودس بچن.
ڕێژیم جومهوری ئسلامی بەردەوام باس لەوە کەی ک بایس ئسرائیل لەبەین بوەن و قودس جوورێ قبلەی دووم موسەلمانەیل بکەفێدە ژیر دەسەڵاتی خوەیان و چەن سالییگە ڕێ ترەک نانەسەو ئەڕای سەفەر وەرەو قودس.
ئی ڕێە لە ڕێ گرووپەیل تروریستی و میلیشیاییە ک لە ناوچەگە چالاکی کەن و ڕێژیم خوەی دامەڕزیانیەسیان یا پالپشتی وەلیان کەی، لە سوریە و عەرواق و فلستین و وڵاتەیل ترەک چالاکی کەن و توان خوەیان نزیک بکەن وە ئسرائیل.
لەی ناوە تا ئیرنگە ڕێژیم نەتەنیا نەتوێنستیە وە ئستائیل نزیکەو بوود و لەبەینی بووەی بەڵکە وەگەردێ دژ کردەوەی ئسرائیل وەرەوڕوو بییە و ڕووژ نییە یەکیگ لە پایگا تروریستییەگانێ ڕێژیم لە ناوچەگە وە دەسێ ئسرائیل لەبەین نەچوود.
ئی بابەتە تەنیا لە دەرەوەی ئێران نییە، بەڵکە لەولاوە ئسرائیل مانگییگ چەند جار سەفەر کەیدە تاران و لە پایتەخت دەسەڵاتدارییان گەورە تروریستەگان و پایگا مووشەکیەگان کوشێد و خاپوور کەی.
ڕووژ جومعە لە کردەوەییگ تازە ک ڤیدیوەگەی وڵاوەو بییە، پایهگای مالک ئەشتەر لە تاران تەقیەسەو و جوورێ هەمیشە باس لەوە کردیەی ک ئوپراسیون ترەک ئسرائیلە ، ک لە دریژەی ئمساڵ فرەتر لە دە جار لە ئێران ئوپراسیون وەڕێ بردیە.
باس سەرەکی لێرە ئەوسە ک ڕێژیم دی ئەو شوعارە وەکار نیەوەی و سەر وەلێ شیویاس و ڕێ قودس گوم کردنە و ترسن پا بنەنە هەر ڕێ ترەکییگ ک وەرەو قودس چوود، چونکە سەرەڕای ئی هەمکە شوعاردان و هەزینە کردنە تا ئیسکە نەتوێنستنە جواو هەڵاماتەگانێ ئسرائیل بییەن و بتوێنن خەسار بوێچگیگ بیەنە ئەو وڵاتە.
وە گشتی وە خاسی ئەڕامان دەرکەفتیە ک ئەو شوعارەیل پوشاڵی و گرووپەیل تروریستی و پایهایەل مووشەکی و لە لای تریش پروپاگاندا لە جەهان و ناوچەگە لە ڕاسای وەهاز نیشاندانێ خوەیان گشتی درو و دەلەسەس و ڕێژیم لە بارێ ئەمنیەتی فرە لاواز و کەم تواناس.
