دیار
لە گیر و دارێ ڕمیانێ ڕێژیمێ پەهلەوی و سەرهەڵدانێ خومەینی و دارو دەسەی، وە بەردەوامی پروپاگاندای ئەوە کریاد ک، نەمایەندەی خودا و نشانەی ئلاهی توای بایدن و مەردوم وە نەهەماتییەگان نجات بیەیدن و فرە نەورد ک ڕێژیم جومهوری ئسلامی وە کۆمەلییگ شوعار دەسەڵات لە ئێران گردە دەس و خومەینی جوورێ ڕەهبەر دیاری کریاد و هەرچەن لە سەفەرەگەی وەرەو ئێران لە پاریس، لە ناو هەواپەیماگە لە جواوێ خەبەرنگارەگە وەت ک هیچ حسییگ نەیرم ک چمە ئێران، وەلی لە بهشت زەهرا دەس کردە سوخەنڕانی و بڕییگ وەعدە دادە مەردوم ک هەژاری نیەمینێد و لە پەیڕەوی لە ئایین ژیانییگ خاس دروس کەن.
فرەی نەورد ک سیما و ناخێ ئی دەسەڵاتە ئەڕای مەردوم وە تیبەتی نەتەوەی کورد کەفتەو دەر و وە حەکم جەهاد، هەڵامت هاوردنە سەر کوردستان و سەس کردنە ژینوسیاد لە وڵاتەگەمان، لەیرە خاڵ سەرەکی ئەوەسە ک عەقڵیەت و سیاسەت ئی ڕێژیمیە، نە لە راسای ئایین و نە یاسا و نە کرامەت ئنسانی چوودە وەر و کوشتن و بڕین و ترۆر و ژینوسیاد و سەرکوت و دەیان کردەوەی دژە ئنسانی، بەشێ سەرەکی ئی ڕێژیمەسە.
یەکیگ لە سەرەکی‌ترین شوعارەگانێ ڕێژیم جومهوری ئسلامی ک تا ئیسکەیش بەردەوامە، ناردن ئنقلابە وەرەو گشت دونیا و تەوەهوم دەسەڵاتداری و حاکمیەت لە سەرایسەرێ جەهانە، ک بەشیگی لە ڕێ ئستفادەی ناڕەوا لە دین وەرەو ناو چوود.
ئی شێوازە لە عەقڵیەت و سیاسەت کردنە، نیاز وە پەروەردە درێد، و ڕێژیمیش وە خاسی زانێد ئەڕای چەسبانن ئەو فکریەتە وە زەین تاکەگان، بایس لە ناو مناڵەیل و جوانەیل کار بکەید، یەکیگ لە نموونە سەرەکییەگان دامەرزاننێ بەسیج دانش آموزی و دەیان نەهاد و بونیاد میلیشیایی ترەکە ک وە شێوەی تایبەت ئەڕای ئامدە کردنێ تاکیگ ترۆریست و ئنتحاری کار کەن.
ئاکامێ ئەو نەهادەیلە لە شەڕی ڕێژیم ئێران و ڕێژیم بەعس عەراق وە خاسی دەرکەفت ک وە شیوە سەرباز مناڵی، فرە لە مناڵریل ئی سەرزەمینە لەو شەڕە دانە کوشت ک ئەو کارە وەگەردێ هیچ یاسای ناونەتەوەیی و ماف مرۆڤ هاوخوانی نەیرێد و بیە بناغەییگ ئەڕای دامەرزاننێ گرووپەیل تروریسی لە دەرەوەی سنوورەگانێ ئێران، ک ئێرنگە درن لە عەراق ق سوریە و لوبنان و وڵاتەیل ترەک چالاکی ترۆریستی کەن.
لەی لای تریش میدیا ڕەوڵییگ سەرەکی درێد لە پەروەردە کردن، ک ڕێژیم جومهوری ئسلامی وە شێوازییگ میدیا وە کار بەید ک لە ڕاسای سیاسەتە دژە ئنسانییەهانی بوود.
وەختییگ ک کانالە تلڤیزیونییەگانێ ڕێژیم تماشای کەید، جیا لە وڵاو کردنێ ئیدئولوژی خوەیان هیچ بەرنامەییگ ئەڕای پەروەردە نەیرن، وە تایبەتی لە بەرنامەی مناڵیەل ک خاسترین وەختە ئەڕای سکڵ دانێ زەینیان، ئەو شیوازە لە بەرنامە سازی ئەڕای گشت تاکەگانێ کۆمەڵگا دیارریە و هانە وەرێ چەو و فرە نیەچیمنە سەریان.
لێرە نموونەییگ تیەریمن لەو کارەیلە و یەکیگ لە کاناڵەگان شی کەیمنەو، ئەوەیش کاناڵی نەهاڵە، ک وە تایبەتی ئەڕای مناڵەیل دروس کریاس، وەختیگ سرچییگ کەید لە ئینترنت لە بارەی بەرنامەگانێ ئەو کاناڵە، ئەوجێ کارەساتەگە ئەڕامان کەفێدە دەر، ک ڕێژیم درێد وە چ شێوازییگ ترۆر و کوشتن و بڕین لە زەین مناڵەیل جیگیر کەیدن.
لەی ڕووژەیلیشە بەشیگ لە یەکییگ لە بەرنامەگان لە تۆڕە کۆمەڵایەتییاگن وڵاو بی ک داڵگ و کوڕیگ جوان درن بەرنامەڕیزی کەن ئەڕای بومبگوزاری، ک فرە دەنگ داسەو و گشت چالاکەیل مناڵ، ماف مرۆڤ و سازمانەیل هاوردیەسە سەر خەت ک کارەساتییگ گەورا درێد وە دژێ جوانەیل و مناڵەیل ئێران وە سەریان تیەیدن و بانانێ کۆمەڵگا وەرەو ڕمیان بەیدن.
هزاران نموونە لەو بەرنامەیل میدیاییە درێ ڕیژیم ک ڕووژانە و مانگانە و لە دریژەی ساڵ ولاو بوون و لە راسی ڕیژیمێ جومهوری ئسلامی ئێران درێد ژینوسایدییگ ئەندیشەیی و فکری لە ناو مناڵەیل گشت کۆمەڵگا وەڕیەو بەید و لێرەسە ک جیا لە دژکردەوەی سازمانەیل، ئەرک سەرەکی ها سەرێ شانێ بنەماڵەگان و شێواز پەروەردە لە ناو ماڵەگانە، ک تا توێنن ڕێگری بکەن ل تماشا کردنێ ئەو بەرنامەیلە و ڕەوشەنگەری بکەن لە ناو مناڵەیلیان.
ئی کارەیلە تەنیا لە راسای بنەماڵە نییە، بەڵکە لە ڕسای نجات دانێ کۆمەلگا و گشت جەهانە و ئەرک گشت تاکیگە وە توندترین شێواز لە نوای عەقڵیەت و کردەوەی ترۆریستی بوسیەی و هەر سیستمییگ ک ترۆر و ترۆریسم سیاسەتی بوود لە بەینی بووەی تا دونیا وە ئاشتی و ئارامش بژیەی.
