کوردستان میدیا: ڕێژیم، بەردەوام و بە مەبەستی میلیتاریزەکردن و گوشاری زیاتر بۆ سەر خەڵکی کوردستان، هێز و چەکوچۆڵ دەنێرێتە شارەکانی کوردستان.
بەپێی ڕاپۆرتی هەواڵنێری ماڵپەڕی کوردستان میدیا، لە شاری سەقز، ڕێژیم لە هەوڵێکی نوێدا و بە مەبەستی زیاتر نیزامیکردنەوەی دۆخی شارەکە و دەوروبەری، بە بەکارهێنانی هێزەکانی "ئینتیزامی و پۆلیسی ڕێگاوبان"، مەیدانی "موکریانـ"ـی ئەو شارەیان بەستووە.
هەروەها ڕێگای هاتوچۆی هاووڵاتییانیان نەداوە و لە ناکاو هێزێکی زۆر بە ماشینی ڕەش و چەکوچۆڵی قورس، خۆیان بە نێو مۆڵگەیەکیان لەنێو "حەنزەڵە"دا کردووە.
هەر لەم پەیوەندییەدا و لە ڕاپۆرتێکی دیکەدا، باس لەوە کراوە کە ڕێژیمی تۆتالیتێری کۆماری ئیسلامی، بەردەوام لە نەغەدەوە هێز ڕەوانەی شاری شنۆ و ناوچە شاخاوییەکانی کێلەشین دەکات.
ڕێژیمی ئیسلامیی ئێران، بەو کردەوانە و بە میلیتاریزەکردن و سەپاندنی دۆخی نیزامی بەسەر ناوچەکەدا، لە هەوڵی کۆنترۆڵکردنی هەڵسوکەوت و هەروەها چاوترسێنکردنی خەڵکی ئەو شارانەدایە.
