کوردستان میدیا: بەرپرسانی ڕێژیم بەردەوام هەوڵی دەستێوەردان لە وڵاتانی ناوچەکەدا دەدەن و بەو کارە نکۆڵییەکانی خۆیان لەو بارەدا وەدرۆ دەخەنەوە.
وەزیری بەرگریی ڕێژیمی ئێران، پاسدار "ئەمیر حاتەمی"، لە دانیشتنێکدا لەگەڵ فەرماندەرانی "هێزی دەریایی" و "هەوانیرووزی" ئەرتەشی عێراق، باسی لەوە کردووە: کە ئەگەر هاوکارییەکانی ئێران نەبوایە، وڵاتی عێراق تا ئێستا هەڵوەشابوو.
هەروەها ناوبراو خوازیاری هاوکاری و دانیشتنی سیاسی و نیزامیی زیاتر لە نیوان عێراق و ئێراندا بووە.
ئەم قسانەی پاسدار"حاتەمی"، لە کاتێکدایە کە ڕێژیمی ئێران، خۆی سەرچاوەی ئاژاوەنانەوە و هەڵوەشانەوەی شیرازەی بیر و باوەڕی خەڵکانی ناوچەکە و وڵاتانی دراوسێیە و بەو دانیشتنە و قسەکانی، دەری خستووە کە ڕێژیمی ئێران بەپێچەوانەی نکۆڵیکردن لە کردەوەکانی لە ناوچەکەدا، دانی بە دەستێوەردانە نیزامی و سیاسییەکانی لەو وڵاتانەدا بەتایبەت لە عێراقدا ناوە.
هەروەها فەرماندەری هێزی دەریایی سپای تێرۆریستیی پاسدارانی ڕێژیم، پاسدار "عەلیڕەزا تەنگسیری"، ڕۆژی پێنجشەممە دیدارێکی لەگەڵ هاوتای عێراقیی خۆی "جاسم ئەلمەعارج" پێک هێنابوو و سەبارەت بە پەرەپێدانی هاوکاری و هاوئاهەنگییان وتووێژیان کردبوو.
ئەم دیدارانە نیشاندەری ئەوەیە، کە ڕێژیمی ئێران سەرەڕای ناڕەزایەتیی وڵاتانی ناوچەکە و کۆمەڵگای نێودەوڵەتی، بەردەوام هەوڵی دەستیوەردان لە وڵاتانی ناوچەکەدا دەدات و بە بێشەرمانەش نکۆڵییان لێ دەکات.
